No. 1 semis spot sinakmal ng Junior Tigresses

MANILA, Philippines — Kinumpleto ng University of Santo Tomas ang pagwalis sa elimination round matapos talunin ang St. John’s Institute-Bacolod, 25-17, 25-23, para kunin ang No. 1 spot sa semifinals ng 2026 Shakey’s Juniors National Invitationals kahapon sa Playtime FilOil Arena sa San Juan City.

Tinapos ng Junior Tigresses ang elims sa malinis na 6-0 record sa torneong suportado ng Shakey’s Pizza Parlor, Peri-Peri Charcoal Chicken, Potato Corner, at R and B Milk Tea.

Pumalo si Nicole Pelaez ng 10 points, habang may walong marka si Anelli Manzanillo kasama ang apat sa panapos na 5-2 atake ng UST sa second set laban sa SJI-Bacolod.

Lalabanan ng Junior Tigresses, nagreyna sa Shakey’s Girls Volleyball Invitational League (SGVIL) Rising Stars Cup Division 1, ang uupong No. 4 team sa knockout Final Four na magsisimula ngayong alas-4 ng hapon.

“Natutunan po namin sa preliminaries na ito kung paano po talaga ibigay ‘yung best effort namin para makuha ‘yung isang puntos,” sabi ni Manzanillo sa weeklong competition na itinataguyod din ng Jetour, Baic, Eurotel, Victory Liner Rent & Go, F2 Logistics, Summit Natural Drinking Water, PusoP.com at Smart Sports.

Nagtapos ang four-game winning streak ng Falcons na nilalabanan ang Guam-based guest team Pacific Volleyball Aca­demy, Inc. habang isinusulat ito sa huling araw ng elims.

Kinuha ng SJI-Bacolod ang 21-20 abante mula sa atake ni Kristel Mirasol bago humataw ng magkasunod na puntos si Manzanillo kasunod ang palo ni Pelaez para sa 23-21 bentahe ng UST.

Ang attack error ni Eliz Menchavez sa panig ng Junior Tigresses ang nagpatabla sa Falcons.

Ngunit umiskor si Manzanillo ng isang kill block para ilagay ang UST sa match point, 24-22.

Sinelyuhan ni Manzanillo ang one-hour, five-minute victory ng Junior Tigresses mula sa kanyang kill block kay Falcons star Caera Celis.