Baldwin, 11 pa pinakakasuhan na ng NBI
Sa pagkamatay ng 2 student athlete
MANILA, Philippines — Pormal nang inirekomenda ng National Bureau of Investigation (NBI) sa Department of Justice (DOJ) na kasuhan sina dating Ateneo Men’s Basketball Team Coach Tab Baldwin at 11 iba pa kaugnay ng pagkasawi ng dalawang student-athlete na sina Rene Baterbonia at Divine Adili.
Bukod kay Baldwin ay pinakakasuhan ng NBI ng reckless imprudence resulting in two counts of homicide sina Ceasar Vincent “CJ” Elumba; Grant Dearns; Reynaldo Jacinto Jr.; Dean Caesar Castaño; Sandro Nicholas Soriano; Hernan Ameer “Buboy” Domingo; at John Eric Rueca.
Habang simple negligence resulting in two counts of homicide naman ang ipinakakaso laban sa Athletics Director ng Ateneo at tatlong resort owner sa Dipaculao, Aurora kung saan ginawa ang team-building activity sina Ateneo Athletic Director Emmanuel Fernandez; Francisco Zubia III, operating manager Hermanos Leisure & Agri-Farm Resort; at co-managers na sina Frederick Barangan Zubia; at Yedda Mary Molina Rubio.
Bahagi ng imbestigasyon ang pagkuha ng mga salaysay ng ilang indibidwal kabilang sina Ateneo President Roberto “Bobby” Yap, SJ; Baldwin, iba pang mga coach, pati na rin ang mga dati at kasalukuyang basketball players, mga miyembro ng coaching staff, utility personnel, at mga nangasiwa sa resort kaugnay sa pagkamatay nina Baterbonia at Adili sa team building activity ng basketball team sa Dipaculao, Aurora noong Hunyo.
Ini-refer naman ng NBI sa Department of Interior and Local Government (DILG) para sa administrative complaint laban sa mga posibleng responsableng opisyal ng Municipality ng Dipaculao, Aurora—Business Permit and Licensing Office (BPLO) officer, Municipal Tourism & Cultural Development Officer and Municipal Disaster Risk and Reduction Management Office (MDRRMO) head.
- Latest
