2 bagitong pulis todas sa ambush!

MANILA, Philippines — Dalawang bagitong pulis ang patay makaraang paulanan ng bala ng armadong grupo sa naganap na pananambang sa Brgy. Tinumigues, Lambayong, Sultan Kudarat noong Martes ng gabi.

Sa report ni P/Brig. Gen. Alan Manibog, director ng Police Regional Office (PRO) 12 (SOCCSKARGEN), kinilala ang mga nasawi na sina Patrolman Apollo Morante Pagurayan at Patrolman Joerel Basilan Bullos, pawang nakatalaga sa 1202nd Maneuver Company, Regional Mobile Force Battalion (RMFB).

Base sa imbestigasyon, magkaangkas sa motorsiklo ang dalawang pulis na pawang naka-combat fatigue uniform nang harangin ng mga kalalakihan na nakapuwesto sa gilid ng kalsada na mga armado ng M16 assualt rifles at paulanan ng bala pagsapit sa nasabing lugar noong Martes ng gabi.

Ayon sa PRO-12, mabilis na nagresponde sa lugar ang mga operatiba, pero hindi na inabutan ang mga salarin na mabilis na nagsitakas at naabu­tang dead-on-the spot si Pagurayan habang mabilis na dinala sa ospital si Bullos, pero idineklarang dead-on-arrival dahil sa tinamong mga tama ng bala sa iba’t ibang bahagi ng katawan.

Narekober ng mga operatiba ng Lambayong Police sa crime scene ang mga basyo ng bala ng M16 rifle na ginamit sa pamamaslang sa biktima.

Kinondena ng PRO-12 ang pamamaslang sa dalawang parak at nangakong bibigyan sila ng hustisya.

Patuloy ang masu­sing imbestigasyon ng mga awtoridad sa motibo ng krimen.