June Mar Fajardo target ika-10 PBA MVP trophy
MANILA, Philippines — Posibleng makamit ni San Miguel superstar June Mar Fajardo ang kanyang PBA record na ika-10 Most Valuable Player trophy sa PBA Season 50.
Bumabandera ang 6-foot-10 center sa labanan sa MVP award sa kanyang nahakot na 29.8 statistical points mula sa nakaraang kampanya ng Beermen sa Philippine Cup (40 percent) at Commissioner’s Cup (30 percent).
Nagtala ang 36-anyos na si Fajardo ng mga averages na 17.0 points, league-best 16.1 rebounds at 3.3 assists sa 37 games sa nasabing dalawang torneo sa PBA Season 50.
Tampok dito ang paghirang sa kanya bilang Philippine Cup Best Player of the Conference (BPC).
Kaagawan ng tinaguriang ‘The Kraken’ para sa highest individual award sina Robert Bolick ng NLEX, Converge rookie Juan Gomez De Liaño, Zavier Lucero ng Magnolia at Justin Baltazar ng Converge.
Tumipa si Bolick ng 26.7 statistical points kasunod sina De Liaño (23.6sps), Lucero (23.3sps) at Baltazar (23.2sps).
Nagkadena si Bolick ng all-around game na 19.2 points, 8.3 assists, 5.2 rebounds at 1.5 steals para sa Road Warriors na hahawakan ngayon ni PBA legend Jimmy Alapag.
Kumolekta si De Liaño ng impresibong 17.6 points, 6.5 rebounds, 5.9 assists at 1.0 steals sa kampanya ng FiberXers para manguna sa Rookie of the Year race.
Nakaupo sa No. 6 spot ng MVP derby si Barangay Ginebra guard RJ Abarrientos, ang Commissioner’s Cup Best Player of the Conference, na may 22.8sps kasunod si teammate Scottie Thompson (22.61sps).
Ang iba pang nasa Top 10 ay sina San Miguel star CJ Perez (22.57sps), Joshua Munzon ng Titan Ultra (22.3sps) at Justin Arana ng Converge (21.2sps).
- Latest
