Pamamaril sa Bagong Silangan High School fake news - QCPD
MANILA, Philippines — Pinabulaanan ng Quezon City Police District (QCPD) ang kumalat na ulat sa social media hinggil sa umano’y school shooting sa Bagong Silangan High School sa Brgy. Payatas, Quezon City kasabay ng paglilinaw na walang naganap na insidente ng pamamaril at ligtas ang sitwasyon sa loob ng paaralan.
Ayon kay QCPD Director PBGen. Randy Glenn Silvio, bandang alas-9:00 ng umaga nitong Huwebes nang makarinig ng malakas na ingay ang mga estudyante at guro. Sa mga oras ding iyon, nagsasagawa ng nakatakdang pagpupulong sa pamunuan ng paaralan ang mga tauhan ng Payatas-Bagong Silangan Police Station (PS 13) sa pangunguna ni PLt. Col. Rowena Amata, kaya agad nilang sinuri ang pinagmulan ng ingay.
Sa isinagawang beripikasyon, natukoy ng mga pulis na ang malakas na tunog ay nagmula sa isang construction site na malapit sa paaralan. Napagkamalan lamang itong putok ng baril ng ilang estudyante at iba pang nakarinig ng ingay, dahilan upang kumalat ang maling impormasyon sa social media.
Matapos ang masusing pagsusuri, idineklara ng QCPD na ligtas ang lugar at walang naitalang nasugatan o anumang hindi kanais-nais na insidente. Agad ding ipinagpatuloy ang normal na klase at iba pang aktibidad sa Bagong Silangan High School.
Kasunod nito, muling nagpaalala ang QCPD sa publiko na maging responsable sa paggamit ng social media at iwasang magbahagi ng hindi beripikadong impormasyon na maaaring magdulot ng takot at kalituhan sa komunidad.
- Latest
