Obrero tiklo sa 3 ilegal na baril at droga
CAMP NAKAR, LUCENA CITY, Philippines — Matagumpay na ipinatupad ng mga tauhan ng Guinayangan Municipal Police Station (MPS) ang Search Warrant Operation sa Brgy. Ligpit Bantayan, Guinayangan, Quezon, na nagresulta sa pagkakadakip sa isang obrero na nakumpiskahan ng tatlong ilegal na baril at droga kamakalawa.
Naaresto ang suspek na kinilalang si alyas “Nestor,” 57 taong gulang at residente ng nasabing barangay, dahil sa paglabag sa Republic Act No. 10591 at Section 11 ng Republic Act No. 9165.
Ayon kay Quezon Police Provincial Office (QPPO) Director PCol. Romulo Albacea, ang operasyon ay isinagawa bandang alas-6:19 ng umaga sa bisa ng Search Warrant na inilabas ng RTC Branch 63, Calauag, Quezon.
Narekober mula sa suspek ang isang improvised caliber .22 rifle, isang caliber .22 revolver, isang caliber .38 revolver, mga bala, at labing-siyam na heat-sealed transparent plastic sachet na naglalaman ng hinihinalang shabu na may kabuuang timbang na 1.5 gramo at may Standard Drug Price na P10,200.00.
Sa kasalukuyan, ang suspek ay nasa kustodiya ng Guinayangan MPS habang inihahanda ang kaukulang kaso para sa paglabag sa RA 10591 at RA 9165.
- Latest
