Bagong footbridge pinasinayaan – MMDA

May bubong, ilaw

MANILA, Philippines — Pormal na pinasinayaan ng Metropolitan Manila Development Authority (MMDA) ang bagong tayong pedestrian footbridge na may bubong at mga pasilidad ng ilaw sa Visayas ­Avenue sa harap ng Maria Montessori School, ­Quezon City.

Ang proyekto ay naaayon sa direktiba ni Pangulong Ferdinand R. Marcos Jr. na magtayo ng imprastraktura na sumusuporta sa ekonomiya ng Pilipinas at makatutulong na mapabuti ang mga kondisyon ng trapiko sa Metro Manila.

Isinagawa ito upang matugunan ang matagal nang mga alalahanin sa kaligtasan ng mga naglalakad sa Visayas Avenue, isang pangunahing kalsadang dinadaanan araw-araw ng libu-libong motorista, commuter, estudyante, at residente.

May average na 1,655 na naglalakad ang tumatawid sa lugar araw-araw, habang humigit-kumulang 35,896 na sasakyan ang dumadaan sa koridor. Ang pangangailangan para sa isang mas ligtas na pasilidad para sa tawiran ay naging mas apurahan kasunod ng isang insidente ng aksidente sa kalsada na kinasangkutan ng isang miyembro ng faculty ng Maria Montessori School noong Enero 2024.

Bilang tugon, pinlano, dinisenyo, at itinayo ng MMDA ang pedestrian footbridge na may bubong na nagbibigay ng proteksyon mula sa malupit na kondisyon ng panahon, at mga pasilidad ng ilaw na magpapahusay sa visibility at seguridad sa gabi at sa mahinang liwanag.

“Ang footbridge na ito ay magbibigay ng ligtas na pasilidad para sa mga mag-aaral, guro, at residente sa lugar na ito,” sabi ni Artes.

Sa ngayon, ang MMDA ay nakakumpleto na ng 140 pedestrian footbridge sa buong ­Metro Manila, na nagsisilbi sa tinatayang tatlong milyong pedestrian araw-araw.