Labor, negosyante nagsumpaki

CEBU, Philippines — Nagpakita og sukwahing baroganan ang mga grupo sa mamumuo ug mga representante sa mga patigayon atol sa public consultation nga gipahigayon sa Regional Tripartite Wages and Productivity Board (RTWPB)-7 kagahapon samtang gisusi sa board kon adunay igo ug makataronganong basehan alang sa sayong pagrepaso sa kasamtangang wage order sa rehiyon.

Matud ni Atty. Evita Balane, RTWPB-7 secretariat nga ubos pa sa pagpaminaw sa mga opinyon ug rekomendasyon sa mga stakeholder ang board ug wala pa magsugod sa pormal nga proseso sa pagtino og bag-ong minimum wage.

Gipasabot ni Balane nga ang unang buluhaton sa board mao ang pagtino kon adunay urgent ug reasonable grounds aron masugdan ang sayong pagrepaso sa wage order sa dili pa ang anibersaryo niini.

Ang labing sayo nga panahon nga mahimong sugdan ang pormal nga deliberasyon mao ang Agosto 5, 2026 kon mapamatud-an sa mga konsultasyon nga adunay lig-ong basehan alang niini.

Giawhag ni Balane ang mga mamumuo, employer ug ubang sektor nga aktibong moapil sa mga konsultasyon aron makatabang sa board sa paghimo og desisyon.

Si Jaime Paglinawan, chairperson sa BAYAN nisaway sa hinay nga tubag sa gobiyerno sa mga kalisdanan nga giatubang sa mga mamumuo.

Iyang gihisgutan nga kaniadto nangayo ang labor groups og P5,000 nga ayuda alang sa mga ubos og kita pinaagi sa National Wages and Productivity Commission apan giingnan nga walay pundo alang niini. Si Kyle Enero, presidente sa BPO Industry Employees Network (BIEN)-Cebu nagkanayon nga ang basic pay sa mga trabahante kinahanglang dili moubos sa P16,425 matag bulan apan bisan pa sa mga salary package nga adunay allowances ug insentibo daghang BPO workers ang adunay basic pay nga ubos niini.

Si Fred Escalona sa PHILEXPORT Cebu nagkanayon nga dili kinahanglan sa mga negosyo lang ipapas-an ang problema sa inflation ug kawalay trabaho.

Gisugyot ni Escalona ang pagkunhod sa buhis sa pagkaon ug petrolyo, pagpaubos sa presyo sa kuryente, pagpalambo sa agrikultura, pagpalig-on sa suporta sa MSMEs ug paghatag og mga insentibo sa negosyo.

Si Jay Fernandez, presidente sa Philippine Retailers Association-Cebu Chapter nagkanayon nga nasabtan sa mga employer ang kahimtang sa mga mamumuo apan kinahanglan nga balanse ug gibase sa datos ang mga solusyon.  Giawhag niya ang gobiyerno nga adunay mas dako nga papel sa pagsulbad sa inflation ug uban pa’ng economic pressures.

Samtang si Delia Suplig sa Mactan Economic Zone Chamber of Exporters and Manufacturers ug Japanese Chamber of Commerce and Industry of Cebu nisuporta usab sa teknikal ug data-driven nga pamaagi sa wage setting.

Gisugyot niya ang pagpalapad sa non-taxable benefits ug insentibo aron modako ang madawat sa mga trabahante nga dili kaayo mosaka ang gasto sa labor. BDB BANAT NEWS