Gisugyot nga Safer Schools Act mas palambuon

CEBU, Philippines — Nagkadako ang panawagan alang sa mas lig-on nga mga lakang sa kaluwasan sa mga eskwelahan human sa pagpamusil sulod sa San Jose National High School sa Tacloban City nga mikalas og tulo ka tinun-an ug miangol sa laing 20. Tungod niini, nanawagan si Senador Bam Aquino og Senate inquiry aron masusi ang duha ka insidente ug mapalambo ang proposed Safer Schools Act, nga nagtumong sa pagpalig-on sa seguridad sulod sa mga eskwelahan, pagpaayo sa safety standards sa mga off-campus activities, ug pagpugong sa susamang trahedya sa umaabot.

Lakip sa ipasusi ang pagkalumos sa Ateneo basketball players nga sila Rene Clert Baterbonia ug Divine Adili atol sa usa ka off-campus activity sa Aurora.

Sumala ni Aquino, susihon usab sa Senado ang mga polisiya sa Department of Education ug Commission on Higher Education, lakip na kung giunsa sa mga menor de edad nga makapasulod og armas sulod sa eskwelahan sa Tacloban.

“Mahalaga na hindi to maulit muli. Hindi gaya ng mga ibang bansa, na pangkaraniwan ang mga school shooting. Sa ating bansa, hindi po acceptable na mangyari ito,” matud ni Aquino.

Giingon sa senador nga ang maong mga trahedya nagpakita sa kakuwang sa kasamtangang mga polisiya sa kaluwasan ug seguridad sa mga eskwelahan, busa gikinahanglan ang mas hugot nga mga lakang aron mapanalipdan ang mga estudyante.

Gilauman nga pinaagi sa proposed Safer Schools Act, mapalig-on ang campus security, mapaayo ang mga safety protocol alang sa off-campus activities, ug masiguro nga magpabiling luwas nga lugar sa pagkat-on ang tanang eskwelahan sa nasud.  MEL BANAT NEWS