Fajardo, Tamayo apil sa 12-man Gilas lineup

CEBU, Philippines —  Duha ka Sugbuanong mga bitoon sa basketbol ang naapil sa pinal nga 12-man lineup sa Gilas Pilipinas nga mopakita og aksiyon sa 3rd window sa FIBA Basketball World Cup 2027 Asian Qualifiers.

Si nine-time PBA MVP June Mar Fajardo sa San Miguel Beer ug Carl Tamayo  sa Changwon LG Sakers sa Korean Basketball League moserbisyo og balik sa national team kauban sila si naturalized player Justin Brownlee, Scottie Thompson, RJ Abarrientos, ug Troy Rosario sa Barangay Ginebra Gin Kings, nga gikoronahang kampiyon sa PBA Season 50 Commissioner's Cup ning bag-ohay pa lamang.

Duyogan sila nilang Chris Newsome, Dwight Ramos, AJ Edu, Kevin Quiambao, Mike Philips ug Justin Baltazar.

Ang Nationals nga gipangulohan ni coach Tim Cone mobiya alang sa katapusang bahin sa qualifiers karong Martes, Hunyo 23, ug mopahigayon og usa ka semana nga training camp didto sa Auckland, New Zealand.

Ang Gilas makigharong sa NZ Tall Blacks sa Hulyo 3. Molarga dayon sila padung sa Perth, Australia alang sa mas lisud nga hagit batok sa Boomers sa Hulyo 6.

Sa kasamtangan, ang Pilipinas nagtabla uban sa New Zealand sa Group A bitbit ang parehong 2-2 nga baraha sunod sa 4-0 nga Australia.

Nangiwit ang Guam sa standings kay bokya pa gihapon human sa upat ka duwa. —

Fajardo, Tamayo apil sa 12-man Gilas lineup