Baricuatro nangayo og katin-awan sa VSMMC

CEBU, Philippines — Nangayo og katin-awan si Cebu Governor Pamela Baricuatro sa mga opisyal sa Vicente Sotto Memorial Medical Center (VSMMC) kabahin sa paspas nga pagdawat sa kanhi consultant sa Kapitolyo nga si Byron Garcia ngadto sa maong ospital human kini madakpan sa kapolisan.

Mitumaw ang isyu taliwala sa mga alegasyon nga nakadawat og espesyal nga pagtagad si Garcia sa dihang gidala kini sa ospital samtang anaa pa sa kustodiya sa kapolisan.

“I also question ba nga ngano mang nakasulod dayon less than an hour, nga atong mga patients nga naay brain bleed lisod man gani isulod,” matud pa sa gobernador. Gipasabot ni Baricuatro nga ang impormasyon nga iyang nadawat nagpakita nga wala pa molapas og usa ka oras sukad sa pagbalhin ni Garcia gikan sa kustodiya sa kapolisan ngadto sa ospital.

Bisan pa niini, gipasalamatan gihapon sa gobernador ang VSMMC tungod sa dugay nang pagtabang niini sa probinsya ug sa katawhan sa Sugbo.

Gihagit usab niya si VSMMC Medical Center Chief Dr. Gerardo Aquino sa paghatag og klarong katin-awan kabahin sa maong insidente.

Una niini giangkon ni Garcia sa usa ka post sa iyang verified Facebook account nga nakaangkon siya og medikal nga emerhensiya human sa giingong pagmaltrato kaniya samtang anaa sa kustodiya sa kapolisan human siya gidakop niadtong Hunyo 12.

Matud niya, gidala siya sa Talisay District Hospital pinaagi sa tabang sa Talisay Rescue Emergency Assistance Team ug gibalhin sa VSMMC alang sa dugang nga pagtambal ug obserbasyon.

Si Garcia gidakop pinaagi sa warrant alang sa tulo ka kaso sa gender-based online sexual harassment ubos sa Safe Spaces Act.

Ang mga reklamo gisang-at ni Dr. Elisse Nicole Catalan, consultant sa Capitol public health program ug anak ni Governor Baricuatro. (BANAT NEWS)