Pepito nipalit og mini fire truck gamit iyang sweldo

CEBU, Philippines — Si Cebu City Councilor Winston Pepito nipalit og usa ka mini fire truck gamit ang iyang sweldo isip usa ka konsehal sa siyudad.

Si Pepito nibutyag sa Banat News nga gitigom niya ang iyang usa ka tuig nga sweldo ug nakahukom nga mopalit og fire truck isip kabahin sa iyang padayon nga pagpalig-on sa serbisyo publiko ilabina sa pagtubag sa mga emerhensiya.

Apan wala ibutyag ni Pepito ang kantidad sa madawat niya’ng sweldo matag buwan lakip ang presyo sa nahisgutang mini fire truck.

Sa pagkakaron, ang mini fire truck gipahimutang diha sa Barangay Bacayan diin nangalagad si Pepito kaniadto isip barangay kapitan sa wala pa siya mapili nga konsehal sa siyudad.

Matud ni Pepito nga ang ideya sa pagpalit sa mini fire truck gisugyot sa iyang kapikas nga si Cathy Pepito kinsa usa ka konsehal sa Barangay Bacayan.

Gipadayag ni Pepito nga usa sa mga nakapaaghat niya nga mopalit og fire truck mao ang daghang dalan sa Bacayan ug ubang bahin sa siyudad nga lisod makasulod ang regular og dagkong fire truck.

Si Pepito nagkanayon nga dili lang alang sa pagresponde sa sunog ang kapuslanang sa mini fire truck mahimo usab kining gamiton sa paghatud og tubig, pagpahigayon og rescue operations ug uban pa’ng emerhensiya diha sa north district.

Dugang ni Pepito nga bisan og giplastar diha sa Barangay Bacayan ang mini fire truck andam kini nga motabang sa ubang mga barangay sa siyudad kon adunay panginahanglan alang sa emergency response. — BDB BANAT NEWS