Game 3 inagaw ng Spurs sa Knicks
NEW YORK — Humakot si Victor Wembanyama ng 32 points, 8 rebounds at 6 assists para tulungan ang San Antonio Spurs sa 115-111 pagdaig sa Knicks sa Game 3 ng NBA Finals.
Nagdagdag si Stephon Castle ng 23 markers para idikit ang San Antonio sa 1-2 ang kanilang best-of-seven series ng New York.
Diniskaril ng 7-foot-4 na si Wembanyama at ng Spurs ang hangad na unang panalo ng Knicks sa kanilang unang NBA Finals home game simula noong 1999.
“At home, it really feels like playing six against five. Here, it feels like five against six,” wika ng 22-anyos na si Wembanyama. “It really shows what teams are made of.”
Bumira si Jalen Brunson ng 32 points at may 28 markers si OG Anunoby para sa New York na kinuha ang 64-57 halftime lead.
Bumalikwas ang San Antonio para agawin ang 111-104 abante mula sa three-point shot ni Castle sa huling 1:53 minuto sa fourth quarter.
Ang dalawang free throws ni Castle sa nalalabing 6.8 segundo ang sumelyo sa panalo ng Spurs.
“I tell the guys, it’s a seven-game series for a reason,” wika ni Knicks coach Mike Brown. “They are a great team. They are well-coached. They have an iconic player. It’s not going to be easy.”
Nagdagdag si center Karl-Anthony Towns ng 11 points habang nahulog si Mikal Bridges sa foul trouble.
“I’m sure Victor has numerous sources of motivation,” sabi ni Spurs coach Mitch Johnson sa kanyang French star center. “I don’t think any of us are surprised or expect anything different than a strong performance.”
Tinapos ng San Antonio ang 13-game winning streak ng New York sa playoffs sa harap ni US President Donald Trump.
Huling nabigo ang Knicks noong Abril 23 mula sa isang one-point loss sa Atlanta Hawks bago magkakasunod na tinalo ang Hawks, Philadelphia 76ers, Cleveland Cavaliers at Spurs sa Games One at Two ng NBA Finals.
Nakatakda ang Game Four bukas kung saan target ng Knicks na maitayo ang 3-1 lead sa serye.
- Latest
