Dapat bang bayaran ng separation pay ang kasambahay?

Dear Attorney,

Sampung taon na sa amin ang aming kasambahay. Bigla siyang nag-resign dahil natanggap siyang trabaho sa Hong Kong. Kailangan ba naming siyang bayaran ng separation pay sa tagal ng pamamasukan sa amin? — Pat

Dear Pat,

Nakasaad sa Republic Act 10361 ang mga karapatan ng mga kasambahay, katulad ng 13th month pay at pagkakaroon ng SSS, PhilHealth, at Pag-IBIG coverage. Pero walang nakasaad sa nasabing batas ang karapatan ng mga kasambahay sa pagkakaroon ng separation pay.

Sa ilalim ng Batas Kasambahay, walang nabanggit na separation pay na may katulad ng depinisyon sa Labor Code, kung saan nakasaad na katumbas ito ng kalahati hanggang isang buwan na suweldo para sa bawat isang taong serbisyo ng empleyado.

Sa halip na separation pay, makatatanggap lamang ang kasambahay ng dagdag na bayad na katumbas ng 15 araw na kita kung siya ay sinisante ng walang dahilan at ng mas maaga kaysa sa nakasaad sa kontratang kanyang pinirmahan, kung mayroon man.

Kahit ang dagdag na bayad na ito ay hindi angkop sa sitwasyon mo dahil hindi mo naman sinisante ang iyong kasambahay.

Kahit pa Labor Code lang ang pagbabatayan, wala pa ring karapatan na makatatanggap ang iyong kasambahay ng separation pay, na hindi ibinibigay sa mga empleyadong kusang nagre-resign sa trabaho.