KNIcks giusban ang Spurs, 2-0 na sa NBA finals

CEBU, Philippines —  Si Jalen Brunson mipasud og free throw sa pinal nga 9.5 segundos sa dihang ang New York Knicks nakalingkawas sa mainit nga endgame rally sa San Antonio aron pakagingon og usab ang Spurs, 105-104, ug pag-angkon og 2-0 nga bentaha sa NBA Finals kagahapong adlawa didto sa Frost Bank Center sa San Antonio, Texas.

Si Brunson mitali og 20 puntos ingon man si Mikal Bridges, samtang si Karl-Anthony Towns mipupo og 21 puntos ug 13 ka rebounds aron tabangan ang Knicks pagposte sa ika-13 nilang sagunson nga daog sa playoffs, nga maoy ikaduhang labing taas nga ratsada sa kasaysayan.

Mihimo sab og kasikas sila si OG Anunoby ug Landry Shamet uban ang 17 ug 13 puntos alang sa Knicks, nga adunay tsansa nga langkaton ang labing una nilang korona sukad niadtong 1973 didto sa ilang tugkaran kay adto man duwaon ang Games 3 ug 4 atubangan sa ilang fans didto sa Madison Square Garden.

Gipaabot nga madungagan pa ang kadasig sa Knicks gumikan kay kompirmado na nga si US President Donald Trump motan-aw sa Game 3 karong Martes, Hunyo 9 (oras dinhi sa Pilipinas).

Ang Spurs nabiyaan og 14 puntos sa katapusang kuwarter apan milusad og dalaygon nga resbak ug nakalabaw pa og dos puntos, 104-102, sa 3-pointer ni Victor Wembanyama sa pinal nga 57.3 segundos.

Sa dihang nagtabla ang iskor, 104-104, sa nahibiling 9.5 segundos, si Wembanyama nakahimo og krusyal nga turnover human nabira niya ang bola sa dihang napasa niya ang bola sa likod sa teammate niyang si Stephon Castle.

Sa sunod nga eksena, si Brunson gi-foul sa Spurs ug milansang og usa sa duha niya ka free throws aron palabwon og balik ang Knicks sa katapusang 7.5 segundos.

Duna pa untay tsansa ang Spurs nga modaog apan wala masud ang pinal nga itsa ni Wembanyama.

Ang 7'4" nga French superstar mibubo og 22 sa iyang 29 puntos sa second half nga iyang gisukipan og siyam ka rebounds, upat ka blocks ug duha ka steals apan wala mosaler ang impresibo niyang salida.

Si De'Aaron Fox mihipos og 20 puntos alang sa Spurs nga bukid ang tungason kay sa kasaysayan sa NBA, wala pa may team nga nakampiyon human mapildi sa nag-unang duha ka duwa sa Finals sa ilang korte.

Ang 1993 Chicago Bulls ni Michael Jordan ug ang 1995 Houston Rockets ni Hakeem Olajuwon mao pa lamang ang laing teams nga nakadaog sa nag-unang duha ka duwa sa usa ka serye sa kampiyonato sa balwarti sa ilang kontra ug pareho nilang nadaog ang titulo.