OFW, mister pinagsasaksak, todas!
Crime of passion
MANILA, Philippines — Patay ang isang babaeng Overseas Filipino Worker (OFW) at isang live-in partner nito matapos pagsasaksakin habang natutulog sa loob ng kanilang tahanan sa isang insidente ng “crime of passion” sa Brgy. Piaz, Villasis, Pangasinan, ayon sa ulat kahapon.
Sa report ng Pangasinan Police, ang mga nasawi ay kinabibilangan ng isang 40-anyos na ginang na isang OFW at isang 42-anyos na magsasaka na kinakasama na nito.
Samantala, ang itinuturong suspect ay isang 47-anyos na mister na dating karelasyon ng nasabing OFW.
Ayon sa pulisya, nangyari ang insidente noong Mayo 31 ng gabi sa loob ng tahanan ng mag-live in partner sa nasabing lugar.
Base sa imbestigasyon, pinasok ng suspect ang tahanan ng mga biktima saka pinagsasaksak sila habang mahimbing na natutulog.
Sa nasabing insidente, nagising ang mga kapitbahay ng mga biktima dahil sa malakas na sigaw ng mag-live in partner habang pinagsasaksak ng galit na galit na suspect.
Ang suspect ay nakita pa ng ilang mga testigo na tumatakbo palabas ng tahanan ng mag-live in partner habang bitbit ang duguang patalim.
Ang mga biktima ay kapwa idineklarang dead-on- arrival sa pagamutan.
Sa teorya ng mga awtoridad, selos ang nakikitang motibo sa krimen dahil sa hindi umano matanggap ng suspect na ipinagpalit siya ng OFW sa lalaking biktima.
- Latest
