Tulfo hinamon si Cayetano

MANILA, Philippines — Hinamon ni Sen. Raffy Tulfo si Senate President Alan Peter Cayetano na dumalo ngayong araw ­(Hunyo 3) sa huling araw ng sesyon ng Senado upang patunayan na matapang siya.

Ginawa ni Tulfo ang hamon kay Cayetano matapos basahin ng kanyang kapatid na si Sen. Erwin Tulfo ang statement ng minorya tungkol sa boykot na ginagawa na mga senador na kasapi ng mayorya kaya dalawang araw nang walang sesyon sa Senado. “Hinahamon ko si Alan Peter Cayetano, kung matapang ka, pumunta ka rito bukas, otherwise duwag ka,” pahayag ni Tulfo, miyembro ng Solid Bloc 11.

Nauna rito, inihayag ni Cayetano na sinusubukan umano ng minorya na agawin ang kontrol ng Senado para pigilan ang pagpapatuloy na pagdinig ng Blue Ribbon Committee sa maanomalyang flood control projects. Binanggit din ni Cayetano na ang ginawang walkout ng minorya noong nakaraang linggo kaugnay sa panukalang online participation sa mga Senate proceedings ay bahagi ng planong agawin ang kasalukuyang liderato ng Senado.

Ngayong Miyerkules (Hunyo 3) malalaman kung dadalo na sa plenaryo ang majority para sa huling araw ng sesyon.