EDITORYAL — Basura sa dagat

Nag-viral sa social media kagahapon ang usa ka lalaking nagpas-an og usa ka sakong basura ug mura lang wala sa iyang bungog nga gilabay kini didto sa dagat diha sa Barangay Suba sa Cebu City.

Ang iyang gibuhat nataymingan nga dunay nagkuha og video ug gi-post dayun kini sa social media. Miani kini og daghang mga reaksyon ug komento gikan sa mga netizens, kasagaran pulos kasagmuyo ug pagsaway batok sa maong lalaki.

Si Mayor Nestor Archival ni-post sa maong video ug nanawagan sa publiko aron ilhon ang maong lalaki. Nitanyag ang siyudad og P10,000 nga reward para sa tawong makahatag og impormasyon kun si kinsa ang maong lalaki.

Tuod man  wala ray 24 ka oras, nailhan ang maong lalaki ug gidala sa buhatan sa mayor sa mga sakop sa Cebu City Police Office.

Ang lalaki giisyuhan og citation ticket sa Cebu City Environmental and Natural Resources Office. Nagpasabot ni nga pamultahon siya o ba kaha mopaubos og community service o pareho.

Dili lang ni ang unang higayon nga dunay nakuhaan og video nga naglabay og basura diha sa maong dagat. Sa niaging tuig, duna say pasahero sa usa ka pumpboat padung sa Bohol ang nakaakto ug nakakuha og video sa usa ka lalaking residente sa maong dapit nga nilabay sad og basura sa dagat.

Kaning mga nagsige og buhat ana imposibleng wala kahibalo nga sayop ug gidili sa balaod ang ilang gibuhat.  Posible nga duna pay ubang mga residente sa lugar nga gabuhat ani sa una pa hangtud karon apan wala pa lang gyud masakpi.

Kay kung buot tan-awon ang ubang mga basurang nanglutaw diha sa ilang dagat mga bag-o pa kaayo. Ang mga basurang gikan sa sapa ug gianod ra diha dili na molutaw kay magkalukot-lukot man na sa pagdagayday sa mga sapa ug inig-gawas sa dagat nitidlom na ang kadaghanan ani kay naa nay sagol lapuk.

Mas labing maayo anang buhaton ,  tanang coastal barangays hasta ang siyudad pinaagi sa CCENRO magbutang og CCTV camera nga mag-monitor sa baybayon 24/7 para mabantayan og maayo ug masikop dayun kung naay mapataka’g labay og basura.

Dili rason nga nagkaproblema ang siyudad sa pagkolekta sa basura para ilabay nalang bisag asa ang biya sa mga tawo.