Naglabay og basura sa dagat gipamulta

CEBU, Philippines — Nailhan na ug gipamulta ang indibidwal nga nakuhaan og video nga nagpataka og labay og basura sa dagat atubangan sa Pasil Fish Market sa Barangay Pasil Dakbayan sa Sugbo.

Suma ni Cebu City mayor Nestor Archival nga dali nga natultolan ang maong tawo human nga adunay usa ka concerned citizen nga mitunol sa bidyo ngadto sa mga awtoridad.

Uban sa paningkamot sa Cebu City Police Office (CCPO) nga gipanguluhan ni Police Colonel George Ylanan ug sa Police Station 6 natultulan ang indibidwal nga giila nga si “Juanito” nga nagpuyo sa Barangay Duljo-Fatima.

Kagahapon gi post kini ni Mayor Archival sa iyang Facebook page aron masayran sa publiko nga bisan pa man og anaa na sa 90% ang pagtangtang sa mga basura gikan sa dagat sa Barangay Pasil ug Barangay Ermita padayon nga naningkamot ang kagamhanan nga malimpyo ang kadagatan sa South Road Properties.

Si Juanito gipatawag sa mayor aron masayran ang rason nganong gibuhat ang paglabay sa basura ug siya mitug-an nga nahunahunaan niya nga ilabay ang mga nakuha nga basura gikan sa iyang pagpanglimpyo sa dalan.

Agi og silot, gi-isyuhan kini og tulo ka citation tickets tungod sa kalapasan sa unang higayon sa Cebu City Ordinance 1361 o Anti-Littering Ordinance, Cebu City Ordinance 2031 ug sa Republic Act 9003 o Ecological Solid Waste Management Act of 2000 diin gibana-bana nga anaa sa P1,800 hangtud sa P3,000 ang multa. 

Sa laing bahin, gipahibalo ni Mayor Archival nga subli na sab nga molabay og basura ang syudad ngadto sa San Rafael Sanitary Landfill sa Aloguinsan samtang gipaabot ang resulta sa imbestigasyon sa Binaliw landfill.

Sa pagkakaron, hatagan og prayoridad sa mayor nga mahakot ang mga basura nga gitapok diha sa Pond A sa SRP ug madala ngadto sa Aloguinsan. (BANAT NEWS)