Alas Pilipinas pasok sa Asian Games
MANILA, Philippines — Hahataw ang Alas Pilipinas sa men’s at women’s divisions ng 2026 Asian Games volleyball event na idaraos sa Nagoya, Japan sa Setyembre.
Mismong si Philippine Olympic Committee (POC) president Abraham “Bambol” Tolentino ang nagkumpirma kahapon ng magandang balita.
Kaya naman makakasama ang Alas Pilipinas sa Team Philippines na ipadadala sa Asian Games.
“This is great news for our volleyball program,” ani Tolentino.
Nakatanggap ng email si Tolentino mula sa Asian Volleyball Confederation (AVC) na naglalaman ng kumpirmasyon sa kwalipikasyon ng Pilipinas sa Asian Games.
Pasok ang Alas Women base sa FIVB ranking sa Asia kung saan hawak nito ang No. 10 spot.
Ang Alas Men naman ay nasa No. 15.
May 16 koponan ang maglalaban-laban sa men’s at women’s sa Asian Games volleyball na gaganapin sa Aichi Prefecture mula Setyembre 27 hanggang Oktubre 3.
Pasok sa men’s division ang host Japan, Iran, Pakistan, South Korea, China, Indonesia, Thailand, Qatar, Bahrain, Chinese-Taipei, India, Vietnam, Kyrgyzstan, Kazakhstan at Hong Kong.
Masisilayan naman sa women’s class ang Japan, Kazakhstan, Iran, China, Chinese-Taipei, Thailand, Vietnam, Qatar, South Korea, Kyrgyzstan, India, Indonesia, Hong Kong, Mongolia at North Korea.
Ang POC ang inaasahang magiging “caretaker” ng volleyball affairs sa Pilipinas matapos masuspinde ng FIVB ang Philippine National Volleyball Federation.
- Latest
