Alas kwalipikado sa Asian Games — Bambol

MANILA, Philippines — Pasok ang Alas Pilipinas sa men’s at women’s divisions ng 2026 Asian Games volleyball event na gaganapin sa Nagoya, Japan sa Setyembre.

Ito ang inihayag ni Phi­lippine Olympic Committee (POC) president Abraham “Bambol” Tolentino kaya’t makakasama ang Alas Pi­lipinas sa Team Philip­pines na ipadadala sa Asian Games.

“This is great news for our volleyball program,” ani Tolentino.

Nakatanggap ng email si Tolentino mula sa Asian Volleyball Confederation (AVC) na naglalaman ng kumpirmasyon sa kwalipikasyon ng Pilipinas sa Asian Games.

Pasok ang Alas Wo­men base sa FIVB ranking sa Asia kung saan hawak nito ang No. 10 spot.

Ang Alas Men naman ay nasa No. 15.

May 16 koponan ang mag­lalaban-laban sa men’s at women’s sa Asian Games volleyball na gaganapin sa Aichi Prefecture mula Setyembre 27 hanggang Oktubre 3.

Pasok sa men’s division ang host Japan, Iran, Pakis­tan, South Korea, China, Indonesia, Thailand, Qatar, Bahrain, Chinese-Taipei, India, Vietnam, Kyrgyzstan, Kazakhstan at Hong Kong.

Masisilayan naman sa women’s class ang Japan, Kazakhstan, Iran, China, Chinese-Taipei, Thailand, Vietnam, Qatar, South Korea, Kyrgyzstan, India, Indonesia, Hong Kong, Mongolia at North Korea.

Ibinalita rin ito ni AVC president Ramon “Tats” Suzara kay Tolentino.

Ang POC ang inaasahang magiging “caretaker” ng volleyball affairs sa Pilipinas matapos masuspinde ng FIVB ang Philippine National Volleyball Federation.

Kasama rin sa Asian Games ang  beach volleyball squads na pamumunuan nina Bangkok 2025 Southeast Asian Games champions Sisi Rondina at Bernadeth Pons.

May 12 bansa ang maglalaban sa beach volleyball kasama ang China, Japan, Chinese Taipei, Hong Kong, Thailand, Indo­nesia, Vietnam, Iran, Kazakhstan, Qatar at Oman.

Lalaruin ang beach volley sa Hekinan Ryokuchi Beach Court sa Hekinan City.

Target ng POC na magpadala ng 700 atleta sa Asian Games.