Hiyasmin (240)
“Totoo ang sinasabi ko Mareng Julia. Baka isipin mo, na porke nabuntis ako ng Kuwaiti ay masama na ang sinasabi ko sa kanila. Marami nang pangyayari na ang ang Pinay ay ginagahasa ng kanilang amo,’’ sabi ni Mama Lira na seryosong seryoso ang boses.
“May nabasa nga ako nun sa diyaryo, Mare.’’
“Totoo na maraming inaabusong Pinay DH sa Kuwait. Mayroon akong nabalitaan na isang Pinay ang ginawang sex slave ng kanyang amo. Mayroon pa nga akong nabalitaan na isang Pinay ang nagtatakbo ng hubad sa kalsada para matakasan ang among manyak.’’
“Diyos na mahabagin!”
“Mabuti na lamang daw ay may mga OFW na nakakita sa DH kaya tinulungan at dinala sa shelter ng embahada natin dun. Kung hindi siya natulungan ng mga kababayan, baka pinatay siya ng amo.’’
“Nakakaawa pala ang kalagayan ng mga Pinay DH. Pero bakit marami pa rin ang gustong dun magpunta, Mareng Lira. Alam na naman nila na maraming manyakis dun.”
“Siguro’y wala na silang ibang mapag-aplayan.”
“Puwede naman sa Hong Kong, di ba?’’
Napatango si Mama Lira.
“Kaya nagpapasalamat pa rin ako at hindi ako nakaranas ng kalupitan at kamanyakan ng amo—’yun nga lang napaibig naman ako sa Kuwaiti at naanakan.’’
“Pero iba naman ang kaso mo Mareng Lira—at siguro talagang niloob ng Diyos na mabuo si Hiyasmin para makilala ng anak ko.’’
“Siguro nga, Mare.”
“Di ba ang saya-saya natin ngayon dahil sa kanilang dalawa.”
(Itutuloy)
- Latest
