BI namimiligro sa pagtakas ni Alice Guo

MANILA, Philippines — Siniguro ni Pangulong Ferdinand Marcos Jr. na “no sacred cow” sa ginagawang imbestigasyon ng Department of Justice (DOJ) kaugnay sa pagtakas sa bansa ni dismissed Bamban, Tarlac mayor Alice Guo.

Sinabi ng Pangulo sa isang ambush interview sa Malakanyang, na nakausap na niya si Justice Secretary Jesus Crispin Remulla para bigyan ng update sa resulta ng imbestigasyon.

Aminado naman si Marcos na itinago sa kanya ng Bureau of Immigration (BI) na nakatakas na ng bansa si Guo.

Halos tapos na rin aniya ang DOJ sa malalim na imbestigasyon at kanilang kikilalanin ang mga sangkot sa pagpapatakas kay Guo at kaaagad silang aaksyon dito.

Tiniyak din ni Pangulong Marcos na may masisibak na mga opisyal ng BI dahil mayroon na silang idea sa mga taong sangkot dito.

“Well let’s not… That’s the last part of this, how far, how deep does this go. Isa lang ba ang tao na involved, o marami sila, o sindikato ito, that’s what we are doing,” pahayag ni Pangulong Marcos.