TNT, SMB target ang 3-0 record
MANILA, Philippines — Pupuntiryahin ng TNT Tropang Giga at San Miguel ang ikatlong dikit na panalo sa PBA Season 49 Governors’ Cup sa Smart Araneta Coliseum.
Lalabanan ng Tropang Giga ang Converge FiberXers ngayong alas-5 ng hapon kasunod ang banggaan ng Beermen at Ginebra Gin Kings sa alas-7:30 ng gabi.
May 2-0 karta ang TNT sa Group A kasunod ang Converge (1-1), NorthPort (1-1), Magnolia (1-1), Meralco (1-1) at Terrafirma (0-2).
Umiskor ang TNT ng 93-73 panalo sa Meralco, habang nagmula ang Converge sa 93-105 pag-yukod sa Magnolia sa kani-kanilang huling laro.
“They play a very different game than Meralco so now... We can’t dwell on our record or this victory because right now our focus just has to be on Converge and nothing else,” ani Tropang Giga coach Chot Reyes sa FiberXers.
Babanderahan ni import Rondae Hollis-Jefferson ang TNT katuwang sina Calvin Oftana, Rey Nambatac, Jayson Castro at Poy Erram kontra kina import Scotty Hopson, Alec Stockton, Justin Arana, Kevin Racal, Alex Cabagnot at Bryan Santos ng Converge.
Ang pagtatala ng 3-0 record ang pakay din ng SMB sa pagsagupa sa Ginebra.
Pinatumba ng Beermen ang Phoenix Fuel Masters, 111-107, tampok ang hinakot na 37 points at 24 rebounds ni eight-time PBA MVP June Mar Fajardo bago isinunod ang Blackwater Bossing, 128-108.
Nakalasap ang Gin Kings ng 64-73 kabiguan sa Rain or Shine Elasto Painters kung saan nadiskaril ang debut nina Season 49 No. 3 overall pick RJ Abarrientos, Season 48 Rookie of the Year Stephen Holt at center Isaac Go noong Sabado sa Candon, Ilocos Sur.
May magkakatulad na 2-0 record ang SMB, Rain or Shine at NLEX sa Group B, habang may 0-1 marka ang Ginebra kasunod ang Phoenix (0-2) at Blackwater (0-3).
- Latest
