Gin Kings basag sa E-Painters sa Ilocos Sur

MANILA, Philippines — Ipininta ng Rain or Shine ang ikalawang sunod na panalo matapos talunin ang Barangay Ginebra, 73-64, sa PBA Season 49 Governors’ Cup kahapon sa Candon City Arena sa Ilocos Sur.

Humakot si import Aaron Fuller ng 16 points, 22 rebounds at 3 assists para banderahan ang 2-0 record ng Elasto Painters sa Group B.

Nagdagdag si guard Andrei Caracut ng 14 markers habang may 13 points si rookie playmaker Felix Lemetti kasama ang krusyal na three-point shot sa huling 1:07 minuto ng fourth quarter.

Nabalewala ang iniskor na 20 points ni Japeth Aguilar sa unang laro ng Gin Kings na nakahugot kina import Justin Brownlee at Season 48 Rookie of the Year Stephen Holt ng 18 at 13 markers, ayon sa pagkakasunod.

Kapwa tumipa ng tig-dalawang puntos sina Season 49 No. 3 overall pick RJ Abarrientos at center Isaac Go para sa Ginebra.

Samantala, itatagay ng San Miguel ang back-to-back wins kontra sa Blackwater ngayong alas-7:30 ng gabi matapos ang banggaan ng NLEX at Phoenix sa alas-5 ng hapon sa Smart Araneta Coliseum.

Umiskor ang Beermen ng 111-107 panalo sa Fuel Masters sa likod ng 37 points at 24 rebounds ni eight-time PBA MVP June Mar Fajardo na gustong makabangon sa nauna nilang kabiguan sa Meralco Bolts sa nakaraang Season 48 Philippine Cup.

“Nandoon na kami. Muntik na kaming manalo pero natalo kami. So ba­gong conference, bagong season, same goal pa rin - makaabot sa finals and then makuha ‘yung championship,” ani Fajardo.

Bagsak naman sa 0-2 ang Bossing makaraang malasin sa Rain or Shine Elasto Painters, 97-110, at sa Road Warriors, 87-104.

Pakay din ng Road Warriors ang 2-0 panimula sa pagsagupa sa Fuel Masters.

Bumanat si Robert Bo­lick ng 24 points, 11 assists at 9 rebounds sa 104-87 pagpapatumba ng NLEX sa Blackwater.