Chery Tiggo, Nxled panalo agad
MANILA, Philippines — Kaagad humataw ng panalo ang Chery Tiggo at Nxled sa Pool A sa pagsisimula ng 2024 Premier Volleyball League (PVL) Reinforced Conference kahapon sa Philsports Arena sa Pasig City.
Winalis ng Crossovers ang Farm Fresh Foxies, 25-13, 27-25, 25-22, habang tinakasan ng Chameleons ang Galeries Tower Highrisers, 25-19, 22-25, 25-18, 25-27, 15-12.
Pumalo si balik-import Khat Bell ng game-high 21 points mula sa 20 attacks at isang block para banderahan ang Crossovers na naglaro na wala sina Alas Pilipinas members Eya Laure at Jen Nierva.
“Mostly lumabas kung ano iyong tine-train namin,” ani coach Kungfu Reyes. “We worked as one, especially the leadership of Khat.”
Pinamunuan ni Caitlyn Viray ang Foxies sa kanyang 13 points at may 10 markers si import Yena Murillo.
Sa unang laro, pumalo si Meegan Hart ng 19 points mula sa 12 attacks at pitong blocks para pangunahan ang Nxled.
Bago ang laro ay tinapik ng Chameleons si Hart imbes na si Chinese import Jiang Xuanyao.
“It was great, we got a win so it’s always great, but I’m feeling really welcomed in the Philippines,” sabi ni Hart. “So far, the experience has been awesome. I’m really excited to be here with the team and win a lot of games.”
Nagdagdag si May Luna ng 17 points sa likod ng 15 attacks, isang block at isang service ace habang may 14 markers si Chiara Permentilla.
Ipinarada ng Highrisers si Thai veteran outside hitter Sutadta Jarawat at hindi si Brazilian outside spiker Monique Helena.
Tumapos si Sutadta na may 14 points sa ilalim ng 17 markers ni France Ronquillo kasunod ang tig-10 markers nina middle blockers Roselle Baliton at Andrea Marzan.
Kasalukuyan pang naglalaro ang Creamline at PLDT habang isinusulat ito kagabi.
Hindi naglaro para sa High Speed Hitters si Fil-Canadian spiker Savi Davison na may minor injury.
- Latest
