Mag-ina niratrat sa hotel, 1 patay
MANILA, Philippines — Patay ang isang senior citizen habang sugatan ang anak na babae nang pagbabarilin ng hindi pa tukoy na salarin sa Makati City, Lunes ng gabi.
Sa ulat ng Makati City Police Station, dead-on-arrival sa Makati Medical Center ang 63-anyos na babae habang patuloy pang nilalapatan ng lunas ang 26-anyos na anak na babae.
Patuloy naman ang pagtunton sa suspek na inilarawang nakasuot ng maong shorts, puting t-shirt at sapatos, na armado ng baril.
Nabatid sa imbestigasyon na dakong alas-6:46 ng gabi ng Agosto 3, nang maganap ang insidente sa harap ng isang hotel panulukan ng Makati Avenue at Durban St. sa Brgy. Poblacion, Makati kung saan bigla na lang pinagbabaril ng suspek ang mag-ina at saka tumakas na naglakad lang.
Isinugod sa nasabing pagamutan ang mag-ina, habang agad namang nagsagawa ng dragnet operation ang Makati Police sa pangunguna ni PCol. Pedro Alagano Jr. at iba pang kalapit na istasyon ng pulisya para sa agarang pagdakip sa suspek at matukoy ang motibo.
- Latest
