Lancers, Warriors mag-abot sa dumot nga rematch

CEBU, Philippines — Ang reigning four-peat champions nga University of the Visayas (UV) Green Lancers makigharong sa University of San Carlos (USC) Warriors sa usa ka seguradong dumot nga rematch sa Cebu Schools Athletic Foundation, Inc. (CESAFI) Season 26 basketball tournament karong adlawa (Sabado, Nobyembre 14) sa Cebu Coliseum.

Determinado ang Lancers nga moresbak sa Warriors, nga milampornas kanila, 81-68, sa una nilang panagtagbo niadtong Agosto 30.

Paningkamotan sa UV nga makabawi sa maong pait nga kapildihan sa dihang ilang sangkaon og usab ang mga sa Carolinians sa alas-5 sa hapon.

Ikatulo karon ang Lancers sa college division standings uban ang 8-3 win-loss rekord, samtang ang Warriors nagtangag og 9-4 nga baraha.

Sa laing collegiate matchup, ang Cebu Institute of Technology-University (CIT-U) Wildcats nagtinguha nga usban og parot ang University of the Philippines Cebu (UPC) Fighting Maroons sa dihang magbangga sila sa alas 3:30 sa hapon.

Ang Wildcats nakarekober human malubong og 26 puntos aron bughaon ang Fighting Maroons, 71-70, sa miagi nilang engkwentro niadtong Septiyembre 8, salamat sa makapakurat nga buzzer-beater gikan sa half-court ni Axyl James Casas.

Bitbit ang 7-4 nga marka, ang Wildcats naglaraw sab nga palig-onon ang ilang kampanya aron makasulod sa Final Four.

Sa high school division, ang University of Cebu Lapu-Lapu and Mandaue (UCLM) Junior Webmasters mosuway pag-inat sa walay pilde nilang ratsada ngadto sa 9-0 sa dihang ilang hamagon ang  University of Southern Philippines Foundation (USPF) Baby Panthers sa alas-2 sa hapon.

Ang CIT-U Junior Wildcats naglaeaw nga bitaron ang 7-2 nilang rekord sa dihang ilang harongon ang Benedicto College (BC) Baby Cheetahs sa alas 10:30 sa buntag. Samtang tiradahan sa Cebu Eastern College (CEC) Dragons ang ikalima nilang daog sa dihang ilang kontrahon ang Don Bosco Greywolves sa alas 12:30 sa udto.