Uyoan gidunggab sa 15-anyos

CEBU, Philippines — Patay ang usa ka 35-anyos nga lalaki human giingong gidunggab sa iyang 15-anyos nga pag-umangkon sa Sitio Sog-ong, Barangay Tapon, Dumanjug, Cebu pasado alas 8:30 sa gabii niadtong Lunes, Oktubre 5, 2026.

Giila ang biktima sa alyas nga “Mar,” 35, walay trabaho ug igsuon sa inahan sa suspek ug residente sa maong lugar.  Ang giingong nidunggab kaniya mao ang iyang 15-anyos nga pag-umangkon nga Grade 10 student.

Sumala sa Dumanjug Municipal Police Station, nakadawat sila og report bahin sa insidente ug mitubag dayon sa maong lugar diin ilang nakit-an ang biktima nga samdan.

Gidala pa ang biktima sa labing duol nga tambalanan apan namatay usab kini tungod sa mga samad nga iyang naangkon. Matud sa kapolisan, adunay naunang panaglalis tali sa biktima ug sa iyang pag-umangkon.

Base sa asoy sa 15-anyos, naglalis sila niadtong gabii sa Lunes hangtod giingong gisumbag siya sa iyang uyoan, hinungdan nga iyaha ning nadunggaban.

Anaa pa sa kustodiya sa kapolisan ang menor de edad nga suspek ug gikatakdang itugyan ngadto sa representante sa Department of Social Welfare and Development (DSWD) sa lungsod alang sa hustong disposisyon subay sa mga pamaagi alang sa mga menor de edad.—  IBM BANAT NEWS