Osmeña nikwestiyon sa niburot nga presyo sa garbage processing proposal

CEBU, Philippines — Gikwestiyon ni Bise Mayor Tomas Osmeña ang pagburot sa presyo sa garbage-processing project nga gisugyot sa Suki Trading Corp. diin gikan sa P250 milyones nahimo na kining P470 milyones.

Ug gumikan niini gi-refer og balik ang letter of intent sa kompaniya ngadto sa Office of the Mayor tungod kay matud ni Osmeña nga kwestiyonable ang quotation sa kompaniya gikan sa P250 milyones niadtong Enero apan sa suwat sa kompaniya ngadto kang Mayor Nestor Archival niadtong Septiyembre 22, 2026 ang presyo sa proposed project nahimong P470 milyones.

Matud pa ni Osmeña nga angayan nga klarohon nganong adunay kalit nga pagsaka sa presyo sa proyekto.

Atol sa diskusyon, gipakita nga posible nga dili parehas ang equipment ug specifications sa duha ka proposal.

Si Konsehal Harry Eran nagkanayon nga possible’ng ang unang proposal nga nahibaw-an ni Osmeña mao ang paggamit og manual garbage segregation.

Sa bag-ong proposal sa Suki Trading Corp. adunay duha ka automatic garbage segregation machines ug duha ka Advanced Waste Solution with Environmental Pollution Control Device (AWS-EPCD) 500 units. Lakip usab sa package ang pag-supply, pag-deliver, pag-install, pag-testing ug pag-commission sa ekipo, pollution-control devices, accessories ug usa ka covered steel shed.

Lahi usab ang lugar nga gihisgotan diin ang unang proposal diha sa North Reclamation Area, samtang ang bag-ong proposal naghisgot sa South Road Properties o laing bakanteng lugar nga mahimong butangan sa mga makina. Gitan-aw ni Eran nga posible nga mao kini ang hinungdan sa kalainan sa presyo.

Nalatid sa proposal nga ang matag AWS-EPCD500 adunay kapasidad nga 10 tonelada nga mixed municipal solid waste kada oras.

Ang matag automatic segregation machine adunay kapasidad nga 12.5 tonelada kada oras.

Ug kong duha ka sets ang gamiton makaproseso kini og basura hangtud sa 700 tonelada nga mixed waste sulod sa 20 ka oras nga operasyon kada adlaw.

Apan tungod sa giisa nga mga pangutana ni Osmeña, niuyon ang konseho nga mas maayo nga ang buhatan sa mayor una ang mosusi sa proposal aron maklaro kon nganong adunay dakong kalahian sa presyo sa proyekto.

Sa pagkakaron, wala kini giuyonan apan wala usab gibasura sa konseho ang proyekto sa Suki Trading Corpo. tungod kay nakita ang potensiyal nga makatabang kini sa inanay nga pagsulbad sa problema sa basura sa siyudad. — /BDB (BANAT NEWS)