Ridon: ‘Unexplained wealth’ ni VP Sara, hindi piso-piso
MANILA, Philippines — Hindi umano dapat palagpasin ang hindi maipaliwanag na paglobo ng yaman ni Vice President Sara Duterte, dahil hindi ito simpleng piso-piso o barya-barya lamang.
Ito ang binigyang-diin ni House prosecutor at Bicol Saro Partylist Rep. Terry Ridon kaugnay ng pagdinig sa Article II (unexplained wealth) sa impeachment trial laban kay VP Sara, na kaniyang hahawakan kasama si Akbayan Partylist Rep. Chel Diokno.
Sa Lunes, Setyembre 14, sisimulan na ang presentasyon ng Article II. Ayon kay Ridon, handa na ang prosekusyon sa pagpiprisinta ng mahigit 1,800 dokumentong ebidensya at 25 testigo.
“Kung billion po ’yung ceiling, inaasahan po natin na pagka tinignan na ho ’yung mismong bank accounts, hindi ho piso-piso, hindi ho barya-barya ‘yun pong maaaring makita po mula po rito,” saad ni Ridon sa News Forum sa Dapo Restaurant, Quezon City.
Gayunman, tumanggi si Ridon na tukuyin ang eksaktong halaga ng umano’y hindi maipaliwanag na kayamanan dahil sa sub judice rule ng impeachment court.
Magugunita na iniulat ng Anti-Money Laundering Council (AMLC) sa Kamara na umabot sa P6.77 bilyon ang umano’y kahina-hinalang transaksyon ng mag-asawa. Sa naturang halaga, P3.77 bilyon ang iniuugnay kay VP Duterte at P2.99 bilyon kay Carpio.
- Latest
