Dakong rollback sa presyo sa lana magsugod karon

CEBU, Philippines — Ang Department of Energy (DOE) nag-anunsiyo og dakong rollback sa presyo sa lana alang sa Hunyo 2 ngadto sa 8, 2026 nga naghatag og kahupayan sa mga motorista ug transport operators tungod sa paghinay sa global nga presyo sa lana.

Atol sa virtual press conference kagahapon, si DOE Secretary Sharin Garin nagkanayon nga ang presyo sa gasolina makasinati og dako nga pagkunhod sugod karong adlawa.

Ubos sa gi-prescribe sa DOE nga adjustments, ang presyo sa gasolina mokunhod og P4.76 matag litro, diesel P9.26 matag litro ug ang kerosene P10.86 matag litro.

Gibutyag ni Garin nga pipila ka oil companies nakahimo og advance o staggered price reductions ug posibleng mohatag pa og mas ubos nga presyo sa ilang mga station.

Matud sa energy secretary nga ang rollback sa bag-ong developments sa global oil market nga nisangpot sa pag-ubos sa fuel costs ug nagdala sa lokal nga pump prices nga duol na sa lebel sa wala pa nisaka ang tensiyon sa Middle East.

Si Garin nagkanayon nga ang presyo sa lana hinay-hinay nga nibalik sa range nga mga P50 hangtud sa P60 matag litro nga nasinati sa mga konsumidor sa wala pa nisaka ang geopolitical tensions nga nisamot sa global oil prices.

Ug magpadayon pa ang pag-stabilize sa presyo basta walay dagkong kalihokan sa Middle East nga naglakip sa Iran, Israel, ug United States.

Gipadayag ni Garin nga ang gobiyerno nagpabiling optimistic nga ang presyo sa gasolina magpadayon sa pag-ubos ug mobalik sa mas abot-kayang lebel alang sa mga Filipinong konsumidor. (BANAT NEWS)