19-anyos nga nangawat sa kanhi niya amo nadakpan

CEBU, Philippines — Nadakpan ang usa ka 19-anyos nga lalaki human kini misaka sa panimay sa iyang kanhi amo sa usa ka Village sa Barangay Dumlog, Dakbayan sa Talisay niadtong Lunes sa kadlawon.

Ang suspek mao si alyas Josephus nga taga Campo 3, Barangay Jaclupan nga lumad nga taga Barangay Ambakon lungsod sa Dumanjug.

Samtang ang biktima nga nagpangidaron og 69 anyos midangop dayon sa kapolisan human sa iyang pagdiskubre sa panghitabo.

Matud pa ni Police Lt. Col. Maila Maramag, hepe sa kapolisan sa Talisay nga gipugos sa suspek pagsulod ang panimay pinaagi sa bintana sa pansayan.

Mokabat sa P160 mil nga salaping cash ang nadala sa suspek.

Nahibaw-an sa kapolisan nga nahimong katabang sa panimay ang suspek sa biktima apan napapahawa kini pipila ka semana na ang nakalabay.

Pinaagi sa CCTV footage nakit-an ang dagway sa suspek hinungdan nga gihimo ang hot pursuit operation ug malampuson nga nasikop si alyas Josephus didto sa ilang dapit.

Narekuber nila ang pipila ka salapi ingon man mga butang nga gipamalit sa suspek.

Lakip sa iyang gipamalit mao ang usa ka sako nga bugas alang sa iyang konsumo, cellphone, ug sandal para sa iyang uyab.

Gisugo usab niya ang iyang mga higala nga mopalit og drugas aron ilang ipamaligya. (BANAT NEWS)