Back Page, Cabarrios bumida sa 3YO maiden race

MANILA, Philippines — Nagpasiklab ang Back Page matapos nitong manalo sa 3-Year-Old & Above Maiden race na nilarga sa Metro Turf, Malvar - Tanauan City, Batangas, Linggo ng hapon

Ginabayan ni jockey JQ Cabarrios, ipinuwesto nito ang Back Page sa pang-apat paglabas ng aparato, hinayaan nitong mauna ang matulin sa largahan na Sandstorm.

Bentahe ang Sandstorm ng dalawang kabayo sa humahabol na Raining In Manila habang nasa pangatlo ang Star Of The Show.

Pag dating sa kalagitnaan ng karera ay nanatili sa unahan ang Sandstorm pero sumasagitsit na papalapit sa unahan ang Back Page habang nasa tersero na lang ang Raining In Manila.

Pagsapit ng far turn ay inagaw na ng Back Page ang bandera sa Sandstorm, nasa pangatlo naman ang Star Of The Show habang pang-apat na ang Raining In Manila.

Kaya naman sa huling kurbada ay tatlong kabayo na ang lamang ng Back Page sa mga humahabol na Star Of The Show at Sandstorm.

Walong kabayo ang agwat ng Back Page sa pumangalawang Star Of The Show pagtawid nito sa finish line,  pangatlo ang Raining In Manila habang pang-apat ang Sandstorm.

Nilista ng Back Page ang tiyempong 1:14.4 minuto sa 1,200 meter race sapat upang hamigin ng winning horse owner na si Manuel Alvarez ang added prize na P22,000.