Gilas maraming natutunan sa FIBA OQT

MANILA, Philippines — Matapos ang matikas na kampanya sa FIBA Olympic Qualifying Tournament, tututukan naman ng Gilas Pilipinas ang se-cond window ng 2025 FIBA Asia Cup qualifiers.

Nais ni Gilas Pilipinas head coach Tim Cone na dalhin ng Gilas Pilipinas ang mga natutunan nito sa Olympic qualifiers na ginanap sa Riga, Latvia.

Ginulat ng Pinoy cagers ang basketball community nang pabagsakin nito ang world No. 6 Latvia sa bendisyon ng 89-80 panalo sa group stage.

“We went to the Latvia game, we just needed to play a very good game. We went out and played a great game and end up beating them,” ani Cone.

Nakipagdikdikan din ang Gilas Pilipinas sa Georgia bago yumuko sa iskor na 96-94.

Tangan ang 1-1 marka, nakapasok ang Gilas Pilipinas sa crossover semis kung saan natalo ito sa Brazil, 71-60.

Sa kabila ng kabiguan, nakataas ang noo ng Gilas Pilipinas na umuwi ng bansa.

Kumbinsido si Cone na patunay lamang ito na kayang makipagsabayan ng Gilas Pilipinas laban sa matitikas na koponan sa mundo.

“We were surprised ourselves. That was the feeling all the way throughout tournament. We just have to put out a good performance every night. But it’s just tough to do in that format and play at your highest level every night,” ani Cone.

Malaking kawalan din para sa Gilas si Kai Sotto na nagtamo ng injury sa laban nito kontra sa Georgia.

“Of course we lost Kai Sotto due to injury. That’s a big blow for us in Brazil because when you get to that point, made the semis, you really feel as if you can get all the way there,” ani Cone.

Nais ni Cone na dalhin ng Gilas Pilipinas ang mga natutunan nito sa FIBA Asia Cup Qualifiers kung saan makakalaban ng tropa ang New Zealand at Hong Kong.