‘Di makalimutan ang karanasan

Dear  Dr. Love,

Ako po si Archie, 19 anyos, at may pro-blema akong hindi ko makalimutan dahil sa sobrang hiya. 

Nitong nakaraang school program, pinilit ako ng girlfriend kong sumayaw sa stage kahit ilang beses ko na siyang tinanggihan. 

Hindi po ako mahilig sumayaw, lalo na sa harap ng maraming tao, dahil mahiyain talaga ako.

Pero dahil ayaw akong tantanan ng girlfriend ko at ayaw ko rin na sumama ang loob niya, napilitan akong umakyat sa stage at sumayaw. 

Habang ginagawa ko iyon, pakiramdam ko ay pinagtatawanan ako ng lahat. Kahit tapos na ang programa, hindi pa rin mawala sa isip ko ang nangyari. 

Nahihiya akong humarap sa mga kaklase ko at paulit-ulit kong naiisip kung ano ang tingin nila sa akin.

Ang masakit pa, parang wala lang sa girlfriend ko ang nangyari. Masaya siya dahil napasayaw niya ako, pero hindi niya naiintindihan ang nararamdaman ko. 

Mahal ko po ang girlfriend ko, pero hindi ko matanggap na napilitan akong gawin ang isang bagay na labag sa kalooban ko.

Dr. Love, paano ko po maaalis ang sobrang hiya at pagsisisi sa nangyari? Tama po bang magtampo ako sa girlfriend ko dahil hindi niya iginalang ang pagtanggi ko?

Archie

Dear Archie, 

Hindi mo kailangang ikahiya ang nangyari dahil ang pagsayaw sa stage ay hindi nakakabawas sa iyong pagkatao. 

Maaaring masyado mong iniisip ang sa-sabihin ng iba, ga-yong posibleng nakalimutan na rin nila ang pangyayaring labis mong pinoproblema.

Gayunman, tama kang masaktan kung hindi iginalang ng iyong girlfriend ang pagtanggi mo. 

Sa isang relasyon, mahalagang matutong makinig at gumalang sa kagustuhan ng isa’t isa. 

Kausapin mo siya nang mahinahon at ipaliwanag ang iyong naramdaman. 

Tandaan mo, ang pagmamahal ay hindi pamimilit, kundi pag-unawa at paggalang.

Higit sa lahat, patawarin mo ang iyong sarili. Huwag mong ha-yaang maging mala-king hadlang sa iyong kumpiyansa ang isang pangyayaring lilipas din. 

Ang tunay na tapang ay hindi lamang ang pagharap sa maraming tao, kundi ang pagkakaroon ng lakas ng loob na ipahayag ang iyong saloobin at panindigan ang iyong mga hangganan.

DR. LOVE