EDITORYAL - Na-hostage tungod sa polusyon

Halos wala nay bulan nga perpektong pisikal nga nakatambong ang mga estudyante sa ilang mga klase sa mga tunghaan tungod aning sagunson nga suspensiyon tungod sa polusyon dala anang haze pun-an pa gyud anang mga hulga diha sa mga eskuylahan.

Kaning suspensiyon sa klase tungod sa polusyon, gibasi kini sa nakuhang impormasyon sa mga monitoring stations sa Environmental Management Bureau nga gimuntar sa nagkalain-laing estratehikong dapit sa Metro Cebu.

Ug kung magsige og kanselar sa klase, unsa pa may makat-onan sa mga kabataan ini og mahuman ang tuig?

Samtang gilantaw sa gobiyerno ang kaluwasan ug proteksyon sa atong mga kabataan ilabi na ang mga tinun-an, kinahanglan sab unta nga apilon ana ang kasigurohan nga dili mabalda ang ilang edukasyon bisan unsa pay mga sitwasyon kung  duna pay mabuhat nga solusyon.

Usa na niana, ang pagpalit sa DepEd o mga local government units og mga N-95 mask o mga facemasks , mga bitamina para sa mga bata nga  libreng ipanghatag diha sa mga eskuylahan imbes nga dili sila patunghaon sa ilang klase.

Sa ingon ana palang nga pamaagi, makat-on gyud ang mga kabataan sa importansya sa pagprotektar sa ilang kaugalingon gikan sa polusyon ug sa samang paagi dili maputol ilang pagtuon.

Makadaghang higayon nga niabot sa “very unhealthy level” ang kalidad sa hangin nga peligrong moresulta sa pagkasakit sa tawo kung dili sila protektado. Mao nga giawhag ang mga tawo nga magsul-ob gyud og N-95 mask para dili makahanggab og hugaw nga hangin.

Kagahapong adlawa, gibalita nga nisaka na ang gidaghanon sa mga nagkasakit sa baga dinhi sa Sugbo karong ikatulong kwarter sa 2026. Gibasol ang haze ug polusyon sa maong hitabo.

Hangtud dili mapalong ang forest fire sa Indonesia nga nilanat na og kapin usa ka bulan nga walay hunong, magsige og ingon ani ang kalidad sa hangin sa Sugbu.