Paano haharapin ang selos?

Dear Dr. Love,

Ako po si “Rachille,” 35-anyos, may asawa at dalawang anak. Mahal ko naman ang mister ko at wala akong duda sa pagmamahal niya sa akin. Pero nitong mga nakaraang buwan, hindi ko maiwasang magselos sa isang babae na palagi niyang nakakasama sa gym.

Pareho silang nag-eehersisyo roon at madalas ko siyang marinig na nababanggit ang pangalan ng babaeng iyon. Minsan, nakikita ko rin sa social media ang mga larawan nilang magkakasama kasama ang iba pa nilang ka-gym. Sinasabi naman ng mister ko na wala akong dapat ipagselos dahil kaibigan lang niya ito at pareho silang may sariling buhay.

Pero bilang asawa, hindi ko maiwasang makaramdam ng kaba. Hindi ko alam kung selos lang ba ito o may dahilan talaga para mag-alala. Ayokong maging kontrabida sa pag-eehersisyo niya, pero ayoko rin namang dumating ang araw na huli ko na malaman kung may namamagitan na pala sa kanila.

Minsan, naiisip ko na baka dahil mahal ko siya kaya ako natatakot na mawala siya. Pero ayokong masira ang pagsasama namin dahil lamang sa selos.

Dr. Love, paano ko po haharapin ang selos ko nang hindi nasisira ang tiwala ko sa aking asawa?

Rachille

Dear Rachille,

Natural ang magselos, lalo na kung may taong madalas na nakakasama ng iyong asawa. Pero tandaan mo, ang selos ay damdamin, hindi ebidensiya. Sa isang pagsasama, mahalaga ang tiwala, respeto at malinaw na hangganan. Hindi kailangang tanggalin ang lahat ng taong maaaring pagselosan. Ang mahalaga, alam ng mag-asawa kung paano iingatan ang kanilang relasyon.

Mas mabuting pa-lakasin mo ang relasyon ninyong mag-asawa. Kapag matatag ang tiwala, hindi madaling matinag ng sinumang kasama niya sa gym.

DR. LOVE