Dahil sa sentimental value

Dear Dr. Love,

Magandang araw po. Isa po akong mister na may simpleng problema pero nagiging sanhi na ng tampuhan sa bahay.

Ayaw na ayaw po ng misis ko na itapon ang mga lumang gamit namin—lumang damit, sirang appliances, kahon-kahong gamit na hindi na nagagamit.

Para po sa akin, mas maganda kung magbabawas kami para mas maaliwalas ang bahay. Pero para sa kanya, may sentimental value raw ang mga iyon.

Kapag binabanggit ko ang pagtapon, parang ako pa ang walang pakialam sa alaala niya. Nauuwi tuloy sa tampuhan.

Mahal ko po ang asawa ko at ayokong pagmulan ito ng mas malaking away. Paano ko po ba siya maiintindihan at paano ko rin maipapaintindi ang side ko?

John

Dear John,

Alam mo, hindi lang mga gamit ang itinatago ng misis mo. Mga alaala ang nakakabit doon. Ang lumang damit, baka alaala ng panahong mas masaya siya.

Ang sirang appliance, baka simbolo ng panahong nagsisimula pa lang kayo. Ang mga papel at bote, baka pakiramdam niya ay bahagi ng kanyang identidad. Para sa iyo, kalat. Para sa kanya, kasaysayan.

Huwag mong gawing “pagtatapon” ang usapan, kundi “pag-aayos.” Mag-set kayo ng limit, tulad ng isang memory box para sa pinakamahalagang bagay. Gawin ninyong bonding ang pag-aayos, hindi argumento.

Ipaliwanag mo na gusto mo lang ng mas maaliwalas na tahanan para mas magaan ang buhay ninyong dalawa—hindi para burahin ang nakaraan.

Ang tahanan ay para sa pagmamahalan, hindi imbakan ng lahat ng bagay.

DR. LOVE