Ipaglalaban ba o lalayo na lang?

Dear Dr. Love,

Nais ko pong humingi ng payo tungkol sa isang bagay na bumabagabag sa akin mula nang ipinakilala ako ng girlfriend kong si Anna sa kanyang pamilya.

Matagal na po kaming magkasintahan ni Anna, halos dalawang taon at napagkasunduan naming ipaalam na sa kanyang pamilya ang aming relasyon. Alam kong mahigpit ang kanyang ama, pero hindi ko inakala na malala ang magiging reaksyon niya.

Sa harap ng buong pamilya, tinawag niya akong walang kwenta at sinabing hindi raw ako karapat-dapat para sa kanyang anak. Napahiya ako, Dr. Love. Hindi ko alam kung paano ko haharapin ang sitwasyon.

Sinubukan kong ipaliwanag na mahal ko si Anna at wala akong masamang intensyon sa kanya, pero hindi ako pinakinggan ng kanyang ama. Nang makaalis ako sa kanilang bahay, hindi ko maiwasang isipin kung tama bang ipaglaban pa namin ang aming pagmamahalan o kung mas makabubuting lumayo na lang ako.

Bryan

Dear Bryan,

Huwag mong isiping ito ay laban na agad na dapat ipanalo. Bigyan mo sila ng panahon upang makita ang tunay mong intensyon. Patuloy kang maging mabuting tao at ipakita mo sa iyong mga kilos na ikaw ay seryoso kay Anna. Maaari kang gumawa ng paraan upang ipakita ang iyong respeto at malasakit sa kanyang pamilya, tulad ng pagpapakita ng pagiging responsable sa iyong trabaho o buhay.

Maaaring sa tamang pagkakataon ay makahanap kayo ng paraan upang maipakilala ka muli sa kanyang ama at ina nang hindi ka agad hinuhusgahan. Magtiwala ka sa proseso at makikita rin nila kung gaano ka kahalaga kay Anna.

DR. LOVE