Ipinagkakalat na ‘sila’ na

Dear Dr. Love,

Ako po si Ode. Masaya ako sa kaibigan kong si Mark. Lagi kaming magkasama simula nung high school pa kami. Alam na niya lahat ng tungkol sa akin at ang ugali ko. Masaya ako lalo na kapag may problema ako, matiyaga siyang nakikinig.  Lagi niya akong binibiro, paano kung ligawan niya ako. Akala ko nagbibiro lang siya, ‘yun pala seryoso siya. Hindi pa ako ready sa commitment.

Nagulat ako sa kanya, hindi ko alam kung ano ang pumasok sa kokote nya, kung bakit pinapatos na nya ako.  Alam naman niyang hindi kami talo. Ito pa ang matindi sa kanya, pinamamalita na niya na boyfriend ko siya. Sinabihan ko siya na itigil na niya dahil parang hindi pa ako handa sa isang relasyon.  Baka kasi magbago ang turingan namin.

Ode

Dear Ode,

Nangyayari talaga na magkaibigan tapos nang maging “sila” na, nagbago ang kanilang pakikitungo sa isa’t isa. Pero hindi naman lahat, dahil depende naman ito sa inyong dalawa. Mag-usap kayo. Madalas naman ang isyu ay selos at marami nang ipinagbabawal. ‘Yan ang mga pwede ninyong i-discuss. Para kung maging kayo na, eh maiwasan ninyo ang mga problemang maaari ninyong harapin

Matuto kayong makinig sa isa’t isa at sa payo ng mga mas nakatatanda sa inyo. Kayo ang gagawa ng inyong love story, ituloy lamang ninyo ang inyong magandang pagsasamahan.

Huwag kang matatakot, kilala mo na si Mark kaya madali mo na siyang mapapaliwanagan kung may gusto kang ipagawa o ipagbawal sa kanya.

DR. LOVE