Dear Dr. Love,
Tawagin mo akong Landsky, dating adik at butangero sa aming lugar. Hindi lang butangero at adik kundi babaero kaya hiniwalayan ako ng misis ko. Matapos ang dalawang taon, natanto ko na ‘di ako mabubuhay nang wala ang aking misis at isang anak.
Binalikan ko siya at nagmakaawa. Ayaw na niyang makipagbalikan. Sabi niya, may iba na siyang mahal. Hindi ako naniniwala dahil nagtanong ako sa mga kapitbahay niya pero sinabing wala naman daw kinakasama ang misis ko. Ano ang dapat kong gawin?
Landsky
Dear Landsky,
Magtiyaga ka sa panunuyo. Para bang nanliligaw kang muli. Ganyan talaga. Kung kailan nawala sa iyo ang isang bagay ay saka mo pa lang napagtatantong mahalaga pala ito sa iyo. Pasasaan ba at lalambot din ang puso niya.
Dr. Love