Tama ba?

Dear Dr. Love,

Matagal ko nang problema ito at gusto kong ikonsulta sa iyo. Tawagin mo na lang akong Bert, 51-anyos at isang biyudo. Noong isang taon lang na­matay ang asawa ko.

Bago siya namatay ay nagkaroon ako ng re­las­yon sa aming housemaid. Naging taksil ako sa aking misis kaya nang mamatay ang asawa ko ay ga­yun na lamang ang aking pananangis. Na­ma­tay sa sakit na cancer of the cervix ang misis ko. Da­­lawang taon din siyang nagdusa sa kanyang sakit. Iyan ang dahilan kung bakit humanap ako ng ibang kandungan na natagpuan ko sa aming maid.

Iniisip ko ngayon, marahil ay naiintindihan ako ng aking misis saan man siya naroroon ngayon. La­la­­ki lang ako na may pangangailangan. Pero mas­­­ki papaano, parang may sumbat sa aking kon­sensiya. Bakit ko nagawa iyon sa isang asawa na uliran at mapagmahal na ang tanging pagku­kulang ay hindi na niya maibigay sa akin ang init ng pag-ibig dahil sa kanyang sakit?

Noong una, akala ko’y parausan ko lang ang aming housemaid. Wika nga, upang bigyang-laya ang nagpupumiglas kong damdamin. Hindi pala. Na­­pamahal na siya sa akin. Hanggang ngayon ay nagsisiping kami as if mag-asawa kami. Hindi alam ng aking kaisa-isang anak na may asawa na ang aming relasyon. Ewan ko kung papayag siya sa aming relasyon.

Trenta-anyos na si Becky at dating may kina­kasama. Tama ba kung magpapakasal ako sa kanya?

Bert

Dear Bert,

Wala namang batas na nagbabawal kanino man, basta’t walang legal impediment, na mag­pa­kasal kahit kanino, ano man ang estado sa bu­hay. Malaya ka at malaya rin ang babaeng napu­pusuan mo. Go for it kung inaakala mong mahal mo siya. Mas tama ito kaysa magsama kayo bilang mag-asawa na walang kasal.

Tungkol sa anak mo, ipagtapat mo ang lahat sa kanya. Maaaring tumutol siya pero wala siyang karapatan para pigilin ang gusto mo.

Kung nagkasala ka man noon sa asawa mo, sigu­ro nama’y pinagsisihan mo na ito at inihingi ng tawad di lang sa iyong asawa kundi lalo na sa Diyos. Kalimutan mo na ito at huwag mo nang ba­ya­ang multuhin ka ng iyong nakaraan.

May karapatan kang lumigaya at ang daigdig ay hindi dapat huminto sa pagyao ng iyong mahal na kabiyak.

Dr. Love