Nanghuwam og kwarta aron ipalit og yuta

Dear Atty. Divine,

Aduna koy pangutana labot sa akong loan. Nanghuwam ko og kwarta sa akong iyaan kay akong paliton ang yuta nga gusto namong tukuran og balay. Matud sa akong iyaan nga himoon lang nga collateral ang yuta nga akong napalit. Ang akong pangutana kun mapakyas ko sa pagbayad sa akong loan, aduna bay katungod ang akong iyaan sa pag-angkon sa akong yuta? Daghang salamat. -- Liza

Dear Liza,

Kun pananglit nagpirmahanay mo og Real Estate Mortgage nga diin imong gihimong collateral ang yuta nga imong napalit sa imong gihuwam nga kwarta sa imong iyaan, ug unya napakyas ka sa pagbayad sa imong utang sa imong iyaan, then and imong iyaan adunay katungod nga mo foreclosed sa imong yuta ug iya kining ipa auction aron ang halin ibayad sa imong utang.  Buot ipasabot nga dili niya mamahimong angkunon ang property isip bayad sa imong utang  gawas lang kun moapil siya sa  auction ug siya ang modaug niini. Apan kun wa moy pinirmahan nga Real Estate Mortgage, ang imong property dili automatic nga mamahimong collateral sa imong utang. Busa ang inyong kasabutan sa imong iyaan magpabilin kining simple loan ug kun mapakyas ka sa pagbayad sa imong loan, ang imong iyaan mamahimong modangop sa korte aron sa pagpasaka og kasong collection of sums of money.  Thank you and God Bless. -- Atty. Divine

* * *

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.