Paggamit og pundo alang sa usa ka rotary conference gikwestyon

CEBU, Philippines — Wala kauyon si Konsehal Harold Kendrick Go sa gisugyot nga paggamit og P1 milyon nga pundo sa siyudad alang sa reimbursement sa gasto sa usa ka Rotary District 3860 – District Conference Cebu 2026.

Sa iyang Facebook page, gipasabot ni Go nga dako ang iyang respeto sa Rotary International ug sa mga programa niini sa pagserbisyo sa komunidad. Giklaro niini nga wala sa organisasyon ang isyu apan sa dili makiangayon nga paggamit sa pondo sa publiko.

Gipakita ni Go ang dokumento nga ang buhatan ni Konsehal Nyza “Nice” Archival nakadawat og suwat gikan sa Office of the Mayor niadtong Agosto 17 nga naghangyo sa pagpa sponsor og usa ka resolusyon alang sa reimbursement sa nagasto sa kalihukan sa Rotary District 3860 nga mokabat ngadto sa P1 milyon.

Nalatid sab sa maong suwat nga ang pundo kuhaon gikan sa City Sponsored Activities – Other Activities of the Office of the Mayor.

Gipadayag ni Go nga lisod dawaton nga gamiton ang P1 milyon alang sa reimbursement sa usa ka conference ilabi na karong panahuna nga daghang Sugboanon ang nanginahanglan og tambal, pagkaon, trabaho, limpyo nga tubig, drainage, ug uban pang batakang serbisyo lakip na ang dakong gasto sa pagdumala sa basura.

Gihimug-atan ni Go nga kon adunay P1 milyon nga magamit nga pondo, mas daghan pa untang mga panginahanglanon ang mahimong matubag sama sa daghang pasyente ang makapalit og tambal, daghang pamilya ang mahatagan og tabang ug daghang gagmay nga proyekto sa barangay ang mapondohan.

“Ngano kini nga organization? Unsa ang objective criteria? Kung ang ubang NGOs ug civic organizations mangayo og parehas nga kantidad, hatagan pud ba sila?” pangutana ni Go.

Si Konsehal Archival mitubag nga kaabag na ang Rotary sa kagamhanan kabahin sa paghatag og benepisyo sa mga pampublikong tunghaan, emergency response ug kaayuhan sa panglawas.

Si ABC President Franklyn Ong nisugyot kang Go nga maghimo og resolusyon aron nga makakuha og katin-awan ug masubay ang giya sa pamaagi sa pagpanghatag og sponsorship sa mga organisasyon gamit ang General Funds.

Mipadayag sab si Konsehal Philip Zafra nga adunay gahum ang Executive Department nga makabuot kung pila ang ihatag nga sponsorship sa nihangyo nga organisasyon.