Kontrabando gikan China

CEBU, Philippines — Nakasakmit ang Bureau of Customs (BOC)-Port of Cebu ang duha ka 40-foot container nga adunay 78,720 ka regulated medical devices nga gikan sa China nga gibanabanang nagkantidad og P1.041 milyon apan kini gideklarar nga “water purifier tube and bag.”

Ang kargamento nga giputos sa 1,800 ka karton gipaubos sa 100 porsyentong pisikal nga inspeksyon ug nadiskubrehan ang 24,000 ka peritoneal dialysis drainage bags, 43,200 ka sterile disposable intravenous infusion/administration sets, ug 11,520 ka hemodialysis blood tubing sets.

Gipakita sa inspeksyon nga wala motakdo ang aktuwal nga sulod sa kargamento sa deklaradong deskripsyon.

Giila usab ang mga butang nga regulated medical devices nga gipailalom sa mga kinahanglanon sa Food and Drug Administration (FDA).

Nag-isyu si District Collector Atty. Zsae Carrie C. De Guzman og Warrant of Seizure and Detention niadtong Agosto 24, 2026, tungod sa paglapas sa Sections 117 ug 1400, in relation to Section 1113 (f) ug (i) sa Customs Modernization and Tariff Act, lakip ang mga balaod, lagda ug regulasyon sa FDA sa pag-import sa medical devices.

Matud ni De Guzman sa usa ka pahayag nga gipatik sa ilang Facebook page nga ang Port of Cebu nagpabiling mabinantayon batok sa misdeclaration ug uban pang pagsulay sa paglikay sa atong mga balaod

Matud pa niya, padayon nga palig-onon sa pantalan ang mga lakang alang sa border protection ug pagsiguro nga ang mga regulated goods motuman sa gikinahanglang mga rekisitos.

Matud ni BOC Commissioner Ariel F. Nepomuceno nga hugot nga gibantayan sa adwana ang pagsulod sa mga regulated goods, ilabi na ang mga produkto nga mahimong direktang makaapekto sa panglawas ug kaluwasan sa publiko.

“Mahigpit nating binabantayan ang pagpasok ng regulated goods, especially products that may directly affect public health and safety,” matud ni Nepomuceno.

Matud niya, ang mga medical devices nga mosulod sa nasod kinahanglan hustong ideklara ug motuman sa mga applicable requirements.

Nagpabilin ubos sa kustodiya sa BOC ang kargamento samtang nagpadayon ang seizure ug forfeiture proceedings.

Matud sa BOC, kabahin ang maong enforcement action sa padayong paningkamot sa bureau, ubos sa direktiba ni Presidente Ferdinand R. Marcos Jr., sa pagpalig-on sa border protection, pagpugong sa smuggling, pagpanalipod sa kita sa gobyerno ug pagpadali sa lehitimong patigayon. — /IBM (BANAT NEWS)