Resibo sa hulga
Niadtong 2023, kanus-a giingon nga nagsugod ang mga hulga batok ni Bise Presidente Sara Duterte, labihan pa nila kasuod ni Presidente Ferdinand Marcos Jr. Lig-on pa ang ilang UniTeam nga nidaog sa eleksiyon sa 2022. Gani, nagtinawganay pa sila og BFF (best friends forever) sa ilang pagbisita sa Sugbo ug ubang bahin sa Pilipinas.
Sa ato pa, direkta pa silang nagkasulti tulo ka tuig ang nilabay. Nganong wala man mosumbong si VP Sara ni BBM sa daghang mga higayon nga gilab-as ang ilang panaghigalaay kon tinuod nga nakadawat og hulga?
* * *
Niadtong 2023, gi-aprobahan sa administrasyon ang dagkong confidential funds nga gipangayo ni VP Sara: P500 milyones para sa Office of the Vice President (OVP); ug P150 milyones para sa Department of Education (DepEd). Puno sa unang P125 milyones nga nadawat ni VP Sara para sa OVP sa Disyembre 2022.
Kinsa may nanghulga ni VP Sara? Dili tingali ang administrasyon nga nihatag sa tanan niyang gipangayo. Apil na ang presidential chopper maong naka-uli sa iyang mga anak kada gabii gikan sa bisan asang bahin sa Pilipinas nga giduaw sa adlawan.
* * *
Enero 2024, usa ka tuig human sa giingong hulga batok ni VP Sara, nagsugod ang Maisug rallies ni kanhi Presidente Rodrigo Duterte nga niawhag sa Armed forces of the Philippines (AFP) ug Philippine National Police (PNP) pagbakwi sa ilang supora sa commander in chief.
Bisan nitambong sa unang rally sa Davao, wala manaway si VP Sara ni BBM. Wala maghisgot sa hulga bisan ni-resign sa DepEd sa Hunyo 2024. Nagsugod og saway sa administrasyon, pero wala gihapon motuki sa hulga, sa Oktubre sa samang tuig.
* * *
Niinsistir si VP Sara nga duna siyay mga dokumento nga momatuod nga gihasi siya ug ang iyang pamilya sa AFP, PNP ug ubang ahensiya sa gobyerno sukad sa 2023. Pero wala siyay napakita nga bisan unsang papel atubangan sa panghimakak sa AFP, PNP ug Malakanyang.
Mas mapuslanon unta ang mga dokumento kay sa iyang gipakita nga walay klarong acknowledgment receipts. Sa pagpanalipod sa iyang kaugalingon, sa OVP ug sa DepEd sa pasangil sa padayong impeachment trial nga nagpataka siya og gasto, posible gani nga nibulsa, sa confidential funds.
* * *
- Latest
