VP Sara gumasta ng P473-K kada oras
Para ubusin P125 milyong spy funds
MANILA, Philippines — Gumasta umano ng humigit-kumulang P473,000 kada oras si Vice President Sara Duterte upang maubos ang P125 milyong confidential funds ng Office of the Vice President (OVP) sa loob lamang ng 11 araw noong Disyembre 2022, ayon kay House trial spokesperson Zia Alonto Adiong.
“Kung i-quantify natin yung 11 days, 473,000 every hour ang nagagastos, para ma-consume, in 11 days, ang 125 million, ganun kabilis at kalaki yung paggastos ng 125 million in 11 days, not mentioning the fact na in 11 days na yan, merong mga holidays diyan, ‘di ba, may mga holidays diyan,” saad ni Adiong.
Ang OVP ay tumanggap ng P125 milyong cash advance noong Disyembre 2022 na agad naubos mula Disyembre 21-31 kung saan agad itong nasilip ni Commission on Audit (COA) auditor Roderick Wamilz
Ayon sa COA, ang confidential funds ay cash advance na may mahigpit na panuntunan at hindi maaaring i-reimburse. Kinuwestiyon ng prosekusyon ang OVP sa paggamit at pag-liquidate ng naturang pondo, na bahagi ng kabuuang P500 milyon confidential funds.
Giit ni Adiong, hindi lamang ito simpleng accounting error. Ang paglihis sa Joint Circular No. 2015-01 ay may mas malalim na implikasyon sa pamumuno at karakter ng isang lider.
“Mapagkakatiwalaan ba natin ang Vice President sa paggamit ng resources ng gobyerno, gayong hindi niya nasunod ang isang napakapayak na patakaran, samantalang isa siyang abogado at mahigit tatlong taon na siyang gumagamit ng confidential funds?” tanong niya.
Ayon kay Adiong, ang umano’y kabiguang sundin ni VP Sara ang mga batayang tuntunin sa paggamit ng confidential funds, sa kabila ng kanyang karanasan bilang alkalde at abogado, ay malinaw na usapin ng tiwala ng mamamayan.
Itinatadhana ng Article XI ng Konstitusyon na ang pampublikong tungkulin ay isang tiwala ng bayan. Para sa prosekusyon, ang mabilis na paggasta ng P125 milyon ay malinaw na betrayal of public trust at culpable violation of the Constitution.
“Kaya iyon pa lamang ay nagpapatunay na may culpable violation of the Constitution… Paano ka mapagkakatiwalaan sa mandatong ibinigay sa iyo ng taumbayan kung binalewala mo kahit ang simpleng patakaran sa paggamit ng confidential funds?” ani Adiong.
- Latest
