Duha patay, usa angol sa pagpamusil   

CEBU, Philippines — Duha ka lalaki ang namatay sa duha ka managlahing insidente sa pagpamusil sa Barili ug Sibonga, Cebu, niadtong Domingo sa gabii, Agosto 23, 2026, samtang usa pa ka lalaki ang nasamdan.

Nasikop usab sa kapolisan sayong buntag niadtong Agosto 24 ang giingong suspek sa pagpamusil sa Barili human sa gipakusgang hot pursuit operation.

Patay ang 58-anyos nga si Nathaniel Esplanada Carampatana, minyo ug residente sa Barangay Maghanoy, Barili, human gipusil sulod sa iyang panimalay pasado alas 7:50 sa gabii niadtong Agosto 23.

Alas 8:35 sa gabii nadawat sa Barili Municipal Police Station ang report gikan sa usa ka concerned citizen bahin sa pagpamusil.

Dali nga mitubag ang mga pulis sa maong report sa pag-abot sa mga otoridad, nakit-an ang biktima nga naglingkod sa usa ka lingkuranan sulod sa iyang balay ug nag-agas ang dugo ilabina sa bahin sa iyang ulo.

Base sa inisyal nga imbestigasyon, anaa sulod sa iyang balay si Carampatana sa dihang miabot ang usa ka lalaki nga nailhan sa alyas “Totoy.”

Gipusil niini ang biktima gamit  ang wala pa matino nga kalibre sa armas diha sa ulo nga maoy hinungdan sa iyang hinanaling kamatayon.

Human sa pagpamusil dali nga  misibat ang suspek. Human sa insidente, gilusad dayun sa Barili police ang  hot pursuit operation batok sa suspek.

Alas 6:30 sa buntag  kagahapon,  Agosto 24, malampusong nadakpan sa ang giila nga si Orlando Sta. Ana Ricablanca, duol sa iyang balay sa Barangay Maghanoy, Barili.

Positibong giila sa usa ka testigo nga si Denalyn Lanojan Paiaganas, live-in partner sa biktima, si Ricablanca isip maoy giingong mipusil ug nakapatay.

Matud sa kapolisan, sa follow-up investigation, mitumaw nga personal nga kasuko ang posibleng motibo sa pagpamusil.

Sumala sa live-in partner sa biktima  naglalis ang biktima ug suspek sa wala pa nahitabo ang krimen.

Kasamtangan gibalhog ang suspek  sa custodial facility sa Barili Municipal Police Station samtang naghulat sa hustong pagsaka sa kaso batok kaniya ngadto sa Prosecutor's Office.

Gipusil

Samtang nangihi

Sa laing insidente sa samang gabii, patay usab ang 29-anyos nga mag-uuma nga si Juvy Hortellano Urot, samtang nasamdan ang iyang kauban human gipusil sa Purok 7, Sitio Tabon, Barangay Tubod, Sibonga.

Sumala sa inisyal nga imbestigasyon, nag-inom ug nag-videoke si Urot uban sa iyang mga higala sa wala pa ang insidente.

Mitindog si Urot ug mipadulong sa usa ka ngitngit nga dapit, mga 10 metros gikan sa iyang mga kauban, aron mangihi.

Kalit nga migawas gikan sa maong dapit ang wala pa mailhing lalaki nga nagsul-ob og itom nga jacket, itom nga bullcap ug jeans, ug gipusil si Urot sa makadaghang higayon.

Naigo siya sa nagkalain-laing bahin sa lawas ug namatay diha-diha dayon. Samtang, naigo usab sa saag nga bala si Eduardo Sabio Ricaborda Jr., 29 anyos, residente sa Barangay Tubod, Sibonga.

Gidala dayon si Ricaborda sa Carcar District Hospital alang sa medikal nga pagtambal.

Alas 11:30 na sa gabii sa dihang nataho sa kapolisan ang maong insidente. Bukirong lugar ang crime scene ug limitado ang cellphone signal, nga nakaapekto sa dali nga pagreport sa insidente.

Padayon ang imbestigasyon sa Sibonga Police Station aron mailhan ang suspek ug matino ang motibo sa pagpamusil. (BANAT NEWS)