Kanhi Comelec commissioner mokandidato pagka senador

CEBU, Philippines — Gipadayag ni kanhi Commission on Elections (Comelec) commissioner Rowena Guanzon nga determinado siyang modagan pagka-senador sa 2028, apan isip independent candidate ug kung suportahan siya ni Vice President Sara Duterte.

Matud ni Guanzon, ang reporma sa sistema sa buhis ug panglawas maoy apil sa iyang mga nag-unang prayoridad kung makalingkod siya sa Senado.

“I am already committed. But I will run as an independent candidate. Wala naman akong partido,” matud ni Guanzon sa usa ka interbyu.

Niadtong Marso, pormal nga gidawat ni Guanzon ang endorsement sa Cebu Alliance for Duterte 2028, nga naglakip kaniya isip usa sa mga potensyal nga kandidato sa pagka-senador.

Matud niya, gusto usab niyang mapasig-uli ang mas lig-on nga representasyon sa mga Bisaya sa Senado.

Usa sa dagkong legislative priorities ni Guanzon mao ang pagrepaso sa sistema sa buhis sa nasud, ilabi na ang 12 porsiyentong value-added tax o VAT.

Gisugyot niya ang pagpaubos sa VAT ug iyang gikutlo ang Vietnam nga adunay mas ubos nga VAT rate isip pananglitan.

Matud ni Guanzon, dili angay nga dugangan pa sa buhis ang palas-anon sa mga Pilipinong nag-atubang na og taas nga gasto sa pagpatambal ug uban pang batakang panginahanglan.

Gusto usab niya nga mapalapdan ang mga benepisyo alang sa overseas Filipino workers (OFWs), lakip ang pagrepaso sa compulsory PhilHealth contributions sa mga OFW nga aduna nay health insurance gikan sa ilang mga employer sa gawas sa nasud.

Gikuwestiyon niya ang iyang nakita nga kakulang sa coverage alang sa mga kabus nga pasyente ug mga persons with disabilities.

Giklaro usab ni Guanzon nga dili siya mangampanya gamit ang saad nga magdala og pondo o proyekto ngadto sa iyang mga botante, tungod kay supak siya sa pork barrel system. — /MEL (BANAT NEWS)